Веды састарэюць хутчэй, чым вы скончыце вучобу: парада ад заснавальніка Gen AI Google
Гонка за талентамі ў сферы ШІ набірае абароты: тэхнагіганты накшталт Meta гатовыя плаціць сотні мільёнаў за найлепшых спецыялістаў. Але заснавальнік першай каманды па генератыўным ШІ ў Google Джад Тарыфі ў інтэрв’ю Business Insider адзначыў, што атрымліваць прасунутую адукацыю накшталт доктарскай ступені толькі дзеля таго, каб запрыгнуць у цягнік хайпу, ужо позна.
«ШІ ў сучасным разуменні знікне да таго часу, як вы скончыце PhD. Нават такія праблемы, як прымяненне ШІ ў робататэхніцы, да таго моманту ўжо будуць вырашаныя. Таму альбо шукайце вузкія нішы, напрыклад ШІ ў біялогіі, альбо не ідзіце туды наогул», — раіць Тарыфі.
Сам ён атрымаў доктарскую ступень па ШІ ва Ўніверсітэце Фларыды ў 2012 годзе, затым амаль 10 гадоў працаваў у Google, а ў 2021-м запусціў стартап Integral AI. Спецыяліст кажа, што PhD падыходзіць толькі тым, хто «апантаны» тэмай, таму што гэта «пяць гадоў жыцця і шмат болю». На яго думку, сёння свет развіваецца настолькі хутка, што за межамі акадэміі можна зрабіць больш: «Калі сумняваецеся — выбірайце „не“, і проста жывіце. Так вы будзеце рухацца хутчэй, навучыцеся значна большаму, станеце гнуткім».
Тарыфі дадаў, што аналагічныя цяжкасці чакаюць прафесіі з доўгім навучаннем — медыцыну і юрыспрудэнцыю. Напрыклад, сцвярджае ён, у медвузах веды састарэлыя да моманту выпуску, а навучанне ўсё яшчэ заснавана на зазубрыванні. У выніку можна марна патраціць гадоў восем.
Каб быць запатрабаваным у эпоху ШІ, Тарыфі раіць развіваць сацыяльныя навыкі: эмпатыю, уменне разумець людзей і граматна фармуляваць запыты да ШІ. «Найлепшае, што вы можаце зрабіць, гэта працаваць над сабой: медытуйце, камунікуйце з сябрамі, спазнавайце сябе». Па яго словах, глыбокае веданне кожнай тэхналогіі не патрэбна: «У мяне PhD па ШІ, але я не ведаю, як уладкаваны апошні мікрапрацэсар. Гэта як з машынай: каб кіраваць, не трэба ведаць усё-ўсё пра тое, як яна ўладкаваная, галоўнае — ведаць, што рабіць, калі нешта пайшло не так».
Читать на dev.by