Айцішнік запусціў беларускамоўны тэхнаблог. Вы можаце далучыцца
Франтэнд-распрацоўшчык запусціў тэхнаблог на беларускай мове bel-frontend.online. Пакуль там у асноўным разбіраюць пытанні з рэальных сумоўяў, але аўтар не супраць, калі вы прапануеце свае тэмы. Спыталі ў яго, якія планы.
Аўтар (папрасіў не называць ягонае імя) таксама вядзе тг-канал «Беларускі франтэнд ды іншая трасца». Пра сябе кажа, што ён франтэнд-распрацоўшчык з вопытам больш за 9 гадоў.
— Маю невялікі досвед у бэкэнд-распрацоўцы ды ў мабільнай (React Native), — дадае суразмоўца. — Яшчэ працую над некалькімі Pet-праектамі. Адзін з якіх — наш блог.
— Чаму вырашылі яго запусціць?
— Блог першапачаткова ствараўся як праект для пачаткоўцаў у франтэндзе, дзе я персанальна хацеў дзяліцца сваім вопытам ды пісаць маленькія артыкулы, — адказвае айцішнік. — Але падчас стварэння блогу да мяне далучыўся яшчэ адзін аўтар. Яна жадала таксама прыняць удзел у напісанні артыкулаў ды распрацоўцы самога праекту. Выбрала разбор памылак на сумоўі — як адну з важных тэм для пачаткоўцаў.
Але тэматыка блогу не абмежавана толькі гэтымі тэмамі. Мы не так даўно абмяркоўвалі, ці не будзе бянтэжыць людзей, што назва пра франтэнд. Але вырашылі пакінуць старую назву.
Увогуле, мы жадаем пашырыць склад аўтараў і тэм нашага блога. Так, напрыклад, мы б чакалі як бэкэндэраў, так і дызайнераў з проджэктамі ды іншых. Тэм шмат, пісаць можна многа пра што.
Цікава было б пачытаць што-небудзь пра AI. На мой погляд, у беларускамоўнай прасторы такой інфармацыі вельмі не хапае.
Зараз наш сайт — гэта куча тэхнічных кампрамісаў, каб паменшыць выдаткі на яго ўтрыманне. То бок, нешта кшталту MVP, дзе мы спрабуем нашу ідэю. Узляціць — добра, не — мы паспрабавалі, і на тым добра. Калі ж будзе больш аўтараў ды наведвальнікаў, то будзем працаваць над яго пашырэннем.
У планах — дадаць каментары, пошук па тэгам, магчымасць захоўваць у сваім акаўнце выбраныя артыкулы ды іншае. Па-добраму, нам патрэбна была б дапамога ў стварэнні карыстальніцкай дамовы — то бок, юрыдычныя пытанні як-небудзь вырашыць.
Шукаеш працу ў IT? Заходзь на jobs.dev.by і будзь у курсе самых свежых вакансій
— Чаму менавіта на беларускай?
— Мы вырашылі пісаць на беларускай, бо кантэнту на гэтай мове з тэматыкай IT вельмі мала. Шмат на ангельскай, шмат на рускай. А на беларускай амаль няма. Я разумею, што ў нашых артыкулаў не будзе такіх праглядаў, як, напрыклад, на Medium ці на dev.to. Але вельмі б хацелася, каб на беларускай мове было значна больш кантэнту.
Калі вы жадаеце далучыцца да праекта, пішыце на e-mail goman.live.service@gmail.com. Усе кантакты па спасылцы.
Читать на dev.by