Николай Чикишев world 24 кастрычніка 2025, 12:03

36 млн карыстальнікаў у Брытаніі выйгралі справу супраць Apple на £1,5 млрд

Кампанія прайграла гістарычны антыманапольны працэс у Вялікабрытаніі аб несправядлівых камісіях у App Store. Кампенсацыі карыстальнікам могуць дасягнуць £1,5 мільярда.

Пакінуць каментарый

36 млн карыстальнікаў у Брытаніі выйгралі справу супраць Apple на £1,5 млрд

Кампанія прайграла гістарычны антыманапольны працэс у Вялікабрытаніі аб несправядлівых камісіях у App Store. Кампенсацыі карыстальнікам могуць дасягнуць £1,5 мільярда.

Лонданскі апеляцыйны трыбунал па справах канкурэнцыі (CAT) прызнаў, што Apple злоўжывала сваім дамінуючым становішчам на рынку алпікацый, спаганяючы «празмерна высокія і несправядлівыя камісіі» з распрацоўшчыкаў у App Store.

Пазоў быў пададзены ад імя 36 мільёнаў брытанскіх карыстальнікаў iPhone і iPad — як прыватных асоб, так і кампаній. Гэта рашэнне стала першым буйным поспехам для калектыўных пазоваў супраць тэхналагічных гігантаў у Вялікабрытаніі і можа каштаваць Apple прыкладна £1,5 мільярда.

На думку суда, кампанія з 2015 па 2020 год фактычна абмяжоўвала канкурэнцыю, забараняючы альтэрнатыўныя крамы аплікацый і ўсталёўваючы камісію ў памеры 30% на продажы і убудаваныя плацяжы. Распрацоўшчыкі, як паказана ў рашэнні, перакладалі каля паловы гэтай пераплаты на спажыўцоў.

Аўтары пазову, на чале з брытанскім даследчыкам лічбавых рынкаў доктарам Рэйчэл Кент, сцвярджалі, што Apple атрымала «празмерны прыбытак» за кошт манапалізацыі распаўсюджвання аплікацый. Пасля рашэння суда Кент назвала вердыкт «знакавай падзеяй і перамогай не толькі для карыстальнікаў App Store, але і для ўсіх, хто адчуваў сябе бяссільным перад глабальнымі тэхнакарпарацыямі».

«Ніякая кампанія, якой бы багатай ці ўплывовай яна ні была, не стаіць вышэй за закон», — падкрэсліла яна. Apple ў адказ заявіла, што «рашуча не згодна» з высновамі суда і мае намер падаць апеляцыю. У заяве кампанія адзначыла, што 85% аплікацый у App Store не плацяць камісію наогул, а для малога бізнесу дзейнічае праграма са зніжанай стаўкай да 15%.

«Гэта рашэнне ігнаруе той факт, што App Store стварае бяспечную і надзейную платформу для карыстальнікаў і дапамагае распрацоўшчыкам дабівацца поспеху», — гаворыцца ў заяве Apple. Кампанія таксама падкрэсліла, што App Store сутыкаецца з «жорсткай канкурэнцыяй» з боку іншых платформаў, якія часта маюць «значна меншы ўзровень канфідэнцыйнасці і абароны дадзеных».

Рашэнне CAT супала з аб’явай брытанскага антыманапольнага ведамства (CMA) аб прысваенні Apple і Google статусу кампаній са «стратэгічным рынкавым уплывам». Гэты крок адкрывае магчымасць абавязаць Apple дазволіць старонім распрацоўшчыкам запуск уласных крам аплікацый на прыладах iPhone — што стане сур’ёзным ударам па яе закрытай экасістэме.