Ультратонкі, аранжавы, натхнёны беларускай жанчынай. «Гарызонт» запусціў вытворчасць новага ноўтбука

Ноўтбук ультратонкі і лёгкі — важыць менш за кілаграм. І вылучаецца незвычайным колерам корпуса — «касмічны аранжавы». Распрацоўшчыкі сказалі, што на стварэнне гаджэта іх натхніў Год беларускай жанчыны, якім абвешчаны ў Беларусі 2026-ы. Навінку называюць сімвалам яе вобраза: яркай, актыўнай, тэхналагічнай і мэтанакіраванай.

Прадпрыемства выпускае ноўтбукі з 2022 года, зараз у лінейцы 30+ мадэляў. Электронныя кампаненты вырабляюць на 11 вытворчых участках, а кожная адзінка праходзіць строгі кантроль якасці.

«Мы вырабляем мацярынскую плату на сучасным абсталяванні. Таксама мы пачалі выпускаць SSD-назапашвальнікі, якія з’яўляюцца ключавой часткай ноўтбука», — распавяла галоўны тэхнолаг холдынгу Таццяна Налівайка. Яна дадала, што акрамя функцыянальнага тэставання ноўтбукі праходзяць нагрузачнае, дзе іх падвяргаюць нагрузцы па 5 гадзін.

Крэатыўны дырэктар «Гарызонта» Віталь Чарняўскі адзначыў, што тэхніка холдынгу шырока запатрабаваная не толькі ў Беларусі, але і за мяжой. «За два месяцы гэтага года мы нарасцілі тэмп росту экспарту па камп’ютарнай тэхніцы па холдынгу больш чым на 85%. Гэта кажа пра шырокі попыт і пра перавагі той тэхнікі, якую мы вырабляем», — заявіў ён.