95% бізнес-пілотаў з ШІ праваліваюцца — але ў 5% ёсць формула поспеху

Даследаванне Масачусэцкага тэхналагічнага інстытута заснавана на 150 інтэрв’ю з кіраўнікамі, апытанні 350 супрацоўнікаў і аналізе 300 публічных укараненняў. Навукоўцы выявілі: толькі каля 5% пілотных праектаў прыводзяць да хуткага росту даходаў, тады як 95% застаюцца на старце, практычна не ўплываючы на паказчыкі кампаній.

Паводле слоў аўтараў, ярчэй за ўсё праяўляюць сябе стартапы, якія факусуюцца на вырашэнні адной канкрэтнай праблемы і кампетэнтна выбудоўваюць партнёрствы. Некаторыя маладыя кампаніі, узначаленыя 19-20-гадовымі заснавальнікамі, за год павялічылі даходы з нуля да $20 мільёнаў.

MIT паказвае, што справа не ў саміх мадэлях і не ў рэгуляванні, а ў «разрыве ў навучанні» паміж інструментамі і арганізацыямі. Універсальныя рашэнні накшталт ChatGPT зручныя для індывідуальных карыстальнікаў, але ў карпаратыўным асяроддзі буксуюць, бо не ўбудоўваюцца глыбока ў бізнес-працэсы.

Больш за палову бюджэтаў на ШІ кампаніі трацяць на маркетынг і продажы, хоць найбольшую аддачу, паводле справаздачы, прыносіць аўтаматызацыя бэк-офіса: скарачэнне выдаткаў на аўтсорсінг і агенцкія паслугі.

Таксама даследчыкі сярод фактараў поспеху ўказваюць набыццё гатовых рашэнняў у спецыялізаваных вендараў і партнёрствы, якія паспяховыя ў 67% выпадкаў, тады як уласныя распрацоўкі — толькі ў траціны. Большасць ШІ-сістэм «не запамінаюць зваротную сувязь і не адаптуюцца з часам». Інструменты накшталт ChatGPT трэба навучаць пад канкрэтныя задачы пасля ўкаранення, лічаць эксперты.

MIT таксама фіксуе рост «ценявога ШІ» — выкарыстання несанкцыянаваных інструментаў накшталт ChatGPT супрацоўнікамі — і складанасці з вымярэннем рэальнага ўплыву ШІ на прыбытак. Перадавыя кампаніі ўжо эксперыментуюць з агентнымі ШІ-сістэмамі, якія здольныя вучыцца і дзейнічаць аўтаномна ў зададзеных рамках. Эксперты лічаць, што менавіта за імі будучыня карпаратыўнага ШІ.