«Плацяць выдатна». ПВТ цешыцца бусту ўнутраных праектаў — даведаліся, што (і пачым) піляць

Статыстыка ПВТ кажа пра тое, што беларускія ІТ-кампаніі моцна прыраслі праектамі на ўнутраным рынку. У рэзідэнтаў Парка выручка ад беларускіх кліентаў яшчэ з мінулага года трымаецца на ўзроўні 25% у агульным кэшфлоў — а калісьці была 10%.

Дынаміку можна тлумачыць інакш: у рэзідэнтаў Парка знізілася доля экспарту, аднак жа павелічэнне беларускіх замоваў — трэнд цікавы.

Гэта дзяржзамова? Наўрад ці

Мы папрасілі пракаментаваць кіраўніка буйной сэрвіснай кампаніі. Ён адразу адкінуў гіпотэзу пра тое, што рост адбыўся за кошт дзяржзамовы. Не, гэта бізнес.

— Хутчэй, гэта рост вымушаных выдаткаў беларускага бізнесу на замену санкцыйнага софту і інтэграцыю, укараненне і падтрымку лакальных рашэнняў, — выказаў здагадку кіраўнік кампаніі. — Усё ж такі абнаўленне многіх ліцэнзій і іх падтрымка сталі ў многіх выпадках недаступныя.

Дык колькі ўнутраных праектаў? Зноў 25

Таксама мы паспрабавалі даведацца, што гэта за праекты, з дапамогай міні-анкеты.

Мы атрымалі 96 адказаў айцішнікаў, якія працуюць на праектах у ІТ-кампаніях у Беларусі. І здзівіліся: нават на такой невялікай выбарцы адлюстроўваюцца афіцыйныя прапорцыі.

25% рэспандэнтаў адказалі, што працуюць на беларускім праекце, у 72% праект замежны (астатнія 3% сумяшчаюць той і другі ці працуюць у прадукце). Зразумела, што ў дадзеным выпадку гаворка ідзе пра людзей, а не пра выручку, аднак паспрабуем не ўлічваць: усё ж такі ў ІТ выручка наўпрост карэлюе з колькасцю супрацоўнікаў.

Тая частка праектаў, якія ідуць на экспарт, раўнамерна (па 27-28%) размеркавана паміж РФ, Амерыкай і ЕС. Прыкметную долю — больш за 10% — займае Блізкі Усход.

Што за праекты

Класіфікаваць беларускія праекты ІТ-кампаній не так проста. Адказы ўдзельнікаў анкеты выразна кажуць толькі пра тое, што ў траціны замоўца — дзяржава, амаль у дзвюх трацін — прыватны бізнес.

Дамен дзяржаўных праектаў назвала толькі невялікая частка ўдзельнікаў: сельская гаспадарка, перапрацоўка аграпрадукцыі, страхаванне, адукацыя, бяспека.

Сярод даменаў прыватных беларускіх праектаў часцей за ўсё сустракаецца прамысловасць, фінансы і банкі, транспарт і лагістыка, гандаль.

Паўтара дзясятка чалавек пагадзіліся коратка апісаць сутнасць свайго беларускага праекта. Вось над чым яны працуюць:

— CRM;

— Аплікацыя для знаёмстваў;

— ПЗ для прыбораў уліку;

— Увесь спектр падтрымкі і дапрацоўкі сістэм, ад сайтаў візітак да ERP;

— Банкаўская аплікацыя для кліентаў-юрасоб;

— Аўтаматызацыя перапрацоўкі аграрнай прадукцыі;

— CRM Bitrix24;

— Аўтаматычныя мыйкі для кароўнікаў з генератыўным ШІ-памочнікам

— Прашыўкі для кантролераў БПЛА;

— Сістэмы плацяжоў і ўсё што звязана з банкамі

— Праграмы лаяльнасці для банкаў у РБ;

— Дзіцячыя сады, бібліятэкі (сутнасць праекта не ўказана);

— Інтэрфераметр;

— Софт для страхавых кампаній.

Ці падабаюцца айцішнікам мясцовыя праекты

Некалькі айцішнікаў пракаментавалі, наколькі задаволены цяперашнімі беларускімі праектамі. Агульнае ўражанне: задаволены (не ўсе), аднак перашкаджае бюракратыя (але ёсць і выключэнні).

— Праекты карысныя і супрацоўнікі задаволены, што робяць карысныя рэчы на карысць краіны, — распавёў айцішнік, які ўдзельнічае ў праекце для дзіцячых садкоў. — Але ў іх фікс прайс, а кампанія не ўмее з гэтым працаваць.

— Перайшоў з аўтсорса год таму — быў прыемна здзіўлены ўзроўнем лічбавізацыі вытворчасці, — напісаў айцішнік, які працуе на прамысловым праекце. — Зп вышэй, чым у аўтсорсе з беларускімі каранямі.

— Адчуванне ад майго праекта, мякка кажучы, не вельмі, — падзяліўся айцішнік, які працуе над ПЗ для страхавых кампаній. — Цалкам састарэлы стэк тэхналогій. Старыя супрацоўнікі (у нас каля 30 распрацоўшчыкаў і тэсціроўшчыкаў) сядзяць у кампаніі па 8 гадоў і больш, а новыя папрацуюць год і сыходзяць.

— Не магу сказаць, што год таму, калі я хадзіў па сумоўях, часта сутыкаўся з беларускімі праектамі: можа, адна з дзесяці вакансій была на мясцовы праект. Але ў выніку апынуўся ў кампаніі, якая абслугоўвае банкаўскую сістэму.

Праект мне цікавы: ёсць пастаяннае развіццё, супрацоўнічаем з амаль усімі буйнымі банкамі Беларусі, часта выкатваем новыя фічы. Я працую каля двух гадоў, але праект ужо гадоў пяць.

На замежных аўтсорс-праектах я таксама паспеў папрацаваць і агулам не магу сказаць, што адчуваю вялікую розніцу. Адзінае — на тых праектах было больш бюракратыі, мы не маглі моцна ўплываць на праект, а тут жа прапаноўваць нейкія ідэі значна лягчэй.

Wanted. Калі вы таксама працуеце ў ІТ-кампаніі на беларускім праекце і хочаце распавесці пра яго (без дэталяў і парушэння NDA), пішыце devby_insight_bot — гэта ананімна.

Як ПВТ пачуваецца ў 2025: айцішнікаў і грошай больш, да аднаўлення яшчэ далёка

Па тэме

Як ПВТ пачуваецца ў 2025: айцішнікаў і грошай больш, да аднаўлення яшчэ далёка

Сеньёры ўсё больш запатрабаваныя. ПВТ ацаніў уплыў AI на рынак працы і ключавыя спецыяльнасці

Па тэме

Сеньёры ўсё больш запатрабаваныя. ПВТ ацаніў уплыў AI на рынак працы і ключавыя спецыяльнасці