Activision Blizzard звольніла сцэнарыста World Of Warcraft за жарты гоблінаў пра «карпаратыўную сквапнасць»

Ковінгтан, які прапрацаваў у студыі амаль дзевяць гадоў, расказаў у твітары, што кіраўніцтва раззлавалі ягоныя рэплікі, напісаныя для «спецыяліста здабычы» — гобліна з Гандлёвай кампаніі, дададзенага ў World Of Warcraft: Dragonflight. Жарты былі пра карпаратыўную сквапнасць, напрыклад: «яшчэ адзін квартал з рэкорднай выручкай», «відаць, у мяне з’явіцца яшчэ адная яхта», «ніякага падзялення прыбытку», «час вярнуцца ў офіс».

Былы супрацоўнік дадаў, што такія рэплікі для гоблінаў з Гандлёвай кампаніі — гэта традыцыя сцэнарыстаў, і ён толькі яе працягнуў. Аднак жарты не спадабаліся «камусьці з высокапастаўленых асоб» Activision Blizzard. Сцэнарыста звольнілі без папярэджання, не спытаўшыся пра ягоныя намеры і не даўшы шанцу перапісаць рэплікі. «Дзевяць гадоў працы скончыліся без пытанняў толькі таму, што хтосьці паглядзеў на бяскрыўдныя жарты і ўбачыў у іх сябе», — напісаў Ковінгтан.

Сцэнарыст растлумачыў, што яго звольнілі да наступлення наступнага месяца, бо кіраўніцтва ведала, што звальненне пазбавіць яго льгот. У лісце кіраўніцтва абвінаваціла супрацоўніка ў «нанясенні шкоды» і «парушэнні кодэкса паводзін». «Непрыстойныя паводзіны і нанясенне шкоды кампаніі шляхам дадання ў гульню непрымальнага і неадпаведнага кантэнту», — гаворыцца ў тэксце. Пасля звальнення Ковінгтана маркетынгавы аддзел апублікаваў рэкламны ролік з найлепшымі рэплікамі гоблінаў. Твіт выдалілі пасля таго, як сцэнарыст паказаў на крывадушныя паводзіны кампаніі.