Айцішнікі задалі 5 вострых пытанняў пра падатак на звышпрыбыткі
+ нясмелая надзея ўслых, што іх гэта не закране.
На мінулым тыдні стала вядома пра планы падатковай увесці падатак на звышпрыбытак. Калі папраўка ў Падатковы кодэкс пройдзе, то даходы фізічных асоб у частцы перавышэння 200 тысяч BYN на год будуць абкладацца падаткам па стаўцы 25%. Гаворка пра заробкі, даходы па грамадзянска-прававых дамовах і дывідэнды. Па сутнасці, ініцыятыва закранае інтарэсы ўсіх, хто зарабляе нета ад $4,3К.
Мы спыталі высокааплатных айцішнікаў і кіраўнікоў ІТ-кампаній пра тое, што яны думаюць пра перспектыву дадатковага падатку і на чый рахунак ён ляжа.
Думаюць яны дрэннае. Але не спяшаюцца рабіць высновы, бо ў цяперашнім выглядзе навіна ім не вельмі зразумелая. Вось на якія цёмныя месцы звяртаюць увагу айцішнікі.
Змест
Адпаведнасць Дэкрэту № 8
— У 8-м дэкрэце прапісаная льгота па падаходным падатку для супрацоўнікаў рэзідэнтаў ПВТ — 9% замест 13%. Пры канцы 2020 года Падатковы кодэкс яе часова адмяніў — спачатку на два гады, да пачатку 2023-га, потым яшчэ на два — да 2025-га. Новы падатак на звышпрыбытак яшчэ раз адкарэктуе 8-ы дэкрэт? Таксама «на час» ці назаўжды?
— У ПВТ існуе льгота па падатку на дывідэнды заснавальнікаў: для рэзідэнтаў РБ — 9%, для нерэзідэнтаў — 5%. Увядзенне падатку на звышпрыбыткі не анулюе ж аўтаматычна гэтую льготу?
Заснавальнікі-рэзідэнты будуць плаціць нашмат больш, чым нерэзідэнты?
Дапусцім, анулюе. Як мяркуе СЕО адной з сэрвісных кампаній, магчымы вялікі дыспарытэт падатковай нагрузкі для ўласнікаў з РБ і іншых краін. Не на карысць беларусаў.
— Уласнік кампаніі ў РБ з пашпартам РБ, які з’яўляецца падатковым рэзідэнтам РБ, будзе плаціць з сумы перавышэння дывідэндаў 25%, а ўласнік кампаніі ў РБ з пашпартам і падатковым рэзідэнцтвам РФ — сукупна 13%.
Калі ў супрацоўніка дзве працы
— У мяне ёсць працаўнік з другой фултайм-працай. Як нашай бухгалтэрыі прапануецца разлічваць яго «звышпрыбыткі»?
Даходы ад паслуг на НПД
— Што з тымі айцішнікамі, хто на НПД? Для тых, хто атрымлівае прыбытак з-за мяжы, няма ніякіх лімітаў, падатак з любой сумы — 10%. Гэтая норма дакладна захаваецца? А як надоўга?
Калі што, кампаніі возьмуць на сябе?
Што да заробкаў высокааплатных супрацоўнікаў, выглядае, усё будзе вельмі індывідуальна. Пакуль аніводны кіраўнік не сказаў dev.by, што кампенсуе скарачэнне зп цэнным кадрам.
Уладальнік невялікі аўтсорс-кампаніі цвёрда сказаў dev.by, што не будзе браць на сябе выдаткі па новым падатку.
— Брута праз падатак на звышпрыбыткі мяняцца не будзе, то-бок нета-зп прасядзе.
У іншай буйной сэрвіснай кампаніі, сказалі, што перад прыняццем рашэнняў дачакаюцца поўнай яснасці ад падатковай.
— Мы дачакаемся канчатковай версіі кодэкса і, калі застануцца незразумелыя моманты, запытаем дадатковыя тлумачэнні. Пасля гэтага будзем вырашаць.
Прагаворваючы праблемныя пытанні, айцішнікі выказваюць слабую надзею, што гэтая папраўка іх не закране.
— Я ўсё яшчэ спадзяюся, што для ПВТ будуць ільготы.
Падатковыя кансультанты не могуць каментаваць гэтых спадзеваў. Яны таксама чакаюць тлумачэнняў наконт падатковай папраўкі ў цэлым і ПВТ у прыватнасці.
— Цалкам можа быць, што новае заканадаўства падкарэктуе дэкрэт № 8, — кажа адзін з іх. — Калі ж не, мусіць быць напісана прама, што льгота для ПВТ захоўваецца.
Нагадаем, у мінулы раз, калі падаходны вырас на 4 п. п., шматлікія кампаніі ўзялі розніцу на сябе. Некаторыя кампаніі падзялілі выдаткі з супрацоўнікамі напалову.
dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам, увагай і данатамі.
І яшчэ крыптой, тут кашалькі.
Дзякуй, што прачыталі гэтае паведамленне.
Читать на dev.by