Айцішніцу не выпусцілі з Беларусі. Яна рэгулярна прыязджала з Еўропы, але ў 2025 годзе знайшлося фота з пратэстаў

У красавіку медыя звярталі ўвагу, што з сайта МУС знікла магчымасць праверыць сябе на наяўнасць забароны на выезд з Беларусі. Практычна адразу функцыя зноў запрацавала, таму перад выездам/уездам з/у Рэспубліку Беларусь усё яшчэ можна праверыць свой статус. Аднак спрыяльны вынік праверкі яшчэ не значыць, што статус не зменіцца пасля перасячэння мяжы. Такі вывад напрошваецца з гісторыі, якую расказаў devby чытач-рэлакант пра сваю калегу, што не вярнулася ў Еўропу пасля паездкі дадому.

Паводле яго слоў, калега рэгулярна ездзіла да родных у Беларусь і паспяхова вярталася назад. Але сёлета на зваротным шляху яе разгарнулі на мяжы з Польшчай: проста сказалі, што дзейнічае абмежаванне на выезд, і параілі звяртацца па тлумачэнні ў ОГіМ.

— Яна так і зрабіла, і высветлілася, што абмежаванне было накладзена сілавікамі праз некалькі дзён пасля яе ўезду — усё таму, што знайшлося фота з пратэстаў 2020 года, дзе яна ў натоўпе на праезнай частцы, — расказаў чытач. — Пры гэтым, здавалася, нічога не прадказвала: ніхто ёю не цікавіўся, не тэлефанаваў, не пісаў. У выніку дзяўчыну абвінавацілі паводле «народнага артыкула».

З ўмоўна станоўчага — яе не арыштавалі. Пасля некалькіх месяцаў следства яе прысудзілі да двух гадоў «хатняй хіміі».

Каб не ўскладняць свой статус «дармаеда», калега ўладкавалася на працу ў Беларусі. А нашай кампаніі давялося прыпыніць супрацоўніцтва з ёй, хаця мы і дапамагаем, як можам. Яшчэ спадзяваемся папрацаваць разам.

Ключавая дэталь у гэтай гісторыі — абмежаванне на выезд было накладзена не падчас, а неўзабаве пасля ўезду ў Беларусь.

Відавочна, не толькі крымінальны пераслед можа стаць прычынай абмежавання на выезд за мяжу. Ёсць і іншыя: запазычанасць фізасобы перад бюджэтам або па аліментах, няяўка на вайсковую службу і г. д.

У той жа час у маі медыя звярталі ўвагу, што нібыта пачасціліся выпадкі, калі забарона на выезд накладаецца праз некалькі дзён пасля ўезду грамадзяніна ў краіну, пасля чаго чалавека судзяць. Праўда, у адсутнасці статыстыкі тут можна аперыраваць толькі суб’ектыўнымі назіраннямі.