У Amazon выжываюць супрацоўнікаў, якія не хочуць пераязджаць бліжэй да офіса

Новую меру пад назвай «return to hub» тэхнагігант праводзіць на працягу апошніх тыдняў. Хабамі называюць лакацыі, за якімі замацаваная тая ці іншая каманда. Супрацоўнікі мусяць працаваць са сваіх хабаў, а не з тых офісаў, якія геаграфічна бліжэйшыя да іх дома.

Напрыклад, адзін з менеджараў у канале Slack прызначыў у якасці хабаў для сваёй каманды Сіэтл, Нью-Ёрк, Х’юстан і Осцін. Тым, хто адмовіцца рэлакавацца ў адзін з названых гарадоў, прыйдзецца або перайсці ў іншую каманду, або звольніцца.

Навіна з’яўляецца часткай маштабнейшай палітыкі Amazon па згортванні аддаленай працы. Першапачаткова офісы прызначалі для большасці асобных супрацоўнікаў, але не для цэлых каманд. Некаторыя супрацоўнікі скардзіліся выданню, што хадзіць у офіс бескарысна, бо многім усё роўна даводзіцца стэлефаноўвацца з калегамі, раскіданымі па ўсёй краіне, па відэасувязі.

Прадстаўнік Amazon у каментары Insider заявіў, што з таго часу, як кампанія ўвяла гібрыдны графік (мінімум тры з пяці дзён у офісе), праца стала ісці энергічней, а супрацоўнікі сталі ўзаемадзейнічаць цясней. «Мы працягнем шукаць лепшыя спосабы сабраць больш каманд разам у адной лакацыі і непасрэдна абмяркоўваць з супрацоўнікамі, як на іх будуць адбівацца нашыя рашэнні», — дадаў ён.

Выданне адзначае, што некаторыя супрацоўнікі ў шоку ад навіны, асабліва тыя, што ўладкоўваліся працаваць менавіта аддалена або пераехалі падчас пандэміі. Да анонса новай палітыкі вяртання людзей у офісы ў лютым кампанія казала, што не збіраецца нікога прымушаць, але працягне «эксперыментаваць».