Алеся Чапкевич world 28 студзеня 2026, 15:49

Amazon скарачае 16 тысяч

Amazon скарачае каля 16 тысяч супрацоўнікаў у розных краінах. Пра гэта паведаміла старшы віцэ-прэзідэнт па персанале Бэт Галеці ў карпаратыўным блогу. У мінулым кастрычніку кампанія скараціла каля 14 тысяч пазіцый.

Пакінуць каментарый

Amazon скарачае каля 16 тысяч супрацоўнікаў у розных краінах. Пра гэта паведаміла старшы віцэ-прэзідэнт па персанале Бэт Галеці ў карпаратыўным блогу. У мінулым кастрычніку кампанія скараціла каля 14 тысяч пазіцый.

Звальненні стануць працягам працы па ўмацаванні арганізацыі, у тым ліку за кошт пазбаўлення ад лішніх слаёў у іерархіі і бюракратыі. Частка камандаў фіналізавалі арганізацыйныя змены ў кастрычніку, але некаторыя завяршылі гэтую працу толькі цяпер.

Паводле слоў Галеці, усё гэта не азначае, што кампанія цяпер будзе кожныя некалькі месяцаў ладзіць масавыя скарачэнні. Але не выключыла далейшыя пераўтварэнні, калі ў іх будзе неабходнасць.

Большасці супрацоўнікаў у ЗША Amazon дасць 90 дзён на пошук новай пазіцыі ўнутры кампаніі. Тым, у каго не атрымаецца і хто вырашыць сысці, акажуць дапамогу, у тым ліку выдадуць выхадную дапамогу і аплацяць медстрахоўку.

Спачатку кампанія звязвала звальненні з ШІ, аднак пазней генеральны дырэктар Эндзі Джэсі казаў, што яны хутчэй пра карпаратыўную культуру, чым пра эканомію ці аўтаматызацыю.

Учора некаторым супрацоўнікам Amazon у календары прыйшлі запрашэнні на размовы наконт звальненняў — іх распаўсюдзілі заўчасна. Таксама на гэтым тыдні кампанія аб’явіла аб закрыцці крамаў Amazon Go і Fresh — не ўдалося знайсці працуючую бізнес-мадэль і зацікавіць пакупнікоў.

Глабальны штат Amazon налічвае 1,5 млн чалавек. Карпаратыўных супрацоўнікаў з іх прыкладна 350 тысяч.