Amazon таемна распрацоўвае ШІ-асістэнта для звышхуткага кодзінгу

Пра сакрэтны праект паведамляе Business Insider са спасылкай на ўнутраны дакумент Amazon Web Services (AWS). Kiro — гэта вэб- і дэсктопная аплікацыя, якая выкарыстоўвае ШІ-агентаў для аналізу запытаў карыстальнікаў і дадзеных, генеруючы код амаль у рэальным часе.

Інструмент падтрымлівае тэкставыя каманды, візуальныя дыяграмы і іншыя тыпы дадзеных, а таксама інтэгруецца з унутранымі і староннімі ШІ-агентамі. Kiro зможа аўтаматычна ствараць тэхнічную дакументацыю, выяўляць патэнцыйныя памылкі і прапаноўваць аптымізацыі кода, павышаючы прадукцыйнасць распрацоўшчыкаў.

У адрозненне ад існуючых ШІ-інструментаў для праграмавання, якія, на думку Amazon, абмежаваныя «кодацэнтрычнымі» інтэрфейсамі, Kiro імкнецца «дэмакратызаваць» распрацоўку, мінімізуючы час на напісанне кода і павялічваючы эфектыўнасць. У дакуменце адзначаецца, што інструмент можа «пераасэнсаваць» працэс стварэння праграмнага забеспячэння.

Amazon ужо прапануе ШІ-асістэнта для распрацоўкі — Amazon Q, але Kiro, імаверна, стане больш універсальным рашэннем, што выкарыстоўвае некалькі ШІ-агентаў для аўтаматызацыі розных аспектаў распрацоўкі. Паводле дакумента, запуск Kiro планаваўся на канец чэрвеня, але пакуль невядома, ці захаваецца гэты графік.

Папулярнасць ШІ-асістэнтаў для кодынгу імкліва расце. Генеральны дырэктар Amazon Энды Джасі падчас нядаўняй справаздачы аб даходах адзначыў «выбуховы рост» выкарыстання такіх інструментаў сярод кліентаў AWS, згадаўшы папулярныя сэрвісы, такія як Cursor і Vercel.

Паводле дадзеных Google і Microsoft, каля 30% іх кода ўжо пішацца з дапамогай ШІ. Аналітыкі Gartner прагназуюць, што да 2028 года 90% інжынераў-праграмістаў у буйных кампаніях будуць выкарыстоўваць ШІ-асістэнтаў, у параўнанні з менш чым 14% на пачатку 2024 года.