Аддзел навін world 6 мая 2025, 10:47

Скарачэнні, ШІ, больш овертаймаў і менш плюшак: ІТ-рэаліі сённяшняга дня

Доўгі час кар’ера ў тэхналагічнай сферы была марай для многіх: яна прыцягвала вялізнымі заробкамі, упэўненасцю ў заўтрашнім дні і мноствам розных бонусаў. Але ўсё змяняецца. І сёння карціна некалькі іншая: галіна скаланулася ад шматтысячных скарачэнняў, бонусы дзеля эканоміі бюджэтаў змяншаюць, заробкі не растуць так, як хацелася б спецыялістам, ды яшчэ і навісла пагроза страціць працу з-за ШІ. Усе непрыемнасці галіны сабраў TechSpot.

1 каментарый

Скарачэнні, ШІ, больш овертаймаў і менш плюшак: ІТ-рэаліі сённяшняга дня

Доўгі час кар’ера ў тэхналагічнай сферы была марай для многіх: яна прыцягвала вялізнымі заробкамі, упэўненасцю ў заўтрашнім дні і мноствам розных бонусаў. Але ўсё змяняецца. І сёння карціна некалькі іншая: галіна скаланулася ад шматтысячных скарачэнняў, бонусы дзеля эканоміі бюджэтаў змяншаюць, заробкі не растуць так, як хацелася б спецыялістам, ды яшчэ і навісла пагроза страціць працу з-за ШІ. Усе непрыемнасці галіны сабраў TechSpot.

Калісьці ў серыяле, названым у гонар Крамянёвай даліны, жартавалі, што айцішнікі атрымліваюць купу грошай амаль ні за што. Іхняе становішча сапраўды было зайздросным яшчэ пару гадоў таму, калі падчас пандэміі ў ІТ-кампаній узляцелі продажы, аўдыторыя і выручка, стартапы купаліся ў інвестыцыях, і ўсе маглі сабе дазволіць наймаць, не заглядваючы далёка наперад і не задумваючыся пра наступствы.

Цяпер амаль кожны тыдзень у навінах з’яўляюцца загалоўкі пра звальненні ў чарговай тэхнакампаніі. Толькі за апошні час Intel пацвердзіла, што можа адпусціць больш за 20 тысяч чалавек, Meta звольніла 5% штату за непрадуктыўнасць, тое ж самае робіць Microsoft. Гуглерам пашанцавала — ім дазваляюць сысці па-добраму.

У цэлым, паводле звестак layoffs.fyi, з пачатку 2025 года было звольнена больш за 50 тысяч супрацоўнікаў у больш як 120 кампаніях. Дарэчы, на сайце з’явіўся новы лічыльнік — для звальненняў у дзяржаўным сектары, у тым ліку ініцыяваных Дэпартаментам эфектыўнасці ўрада ЗША пад кіраўніцтвам Ілана Маска.

Акрамя працоўных месцаў, у галіне знікаюць і плюшкі, якія рабілі працоўныя будні больш зручнымі. І гаворка не толькі пра неабмежаваныя адпачынкі, бясплатны мерч, пральні і ежу ў карпаратыўных сталовых. Працадаўцы выступаюць супраць аддаленнай працы. У Intel цяпер трэба працаваць чатыры дні ў офісе замест трох, яшчэ больш жорсткая палітыка RTO у Amazon (хоць у Еўропе правілы мякчэйшыя, чым у ЗША). Некаторыя кампаніі прымушаюць супрацоўнікаў наведваць офіс і нават змяняць месца жыхарства пад пагрозай звальнення ці коштам кар’ернага росту.

«Коллекционировали нас как покемонов»: уволенная сотрудница о работе в Meta

Wall Street Journal адзначае, што заробкі ў Крамянёвай даліне ўсё яшчэ добрыя, хоць у спецыялістаў у галіне ШІ яны растуць хутчэй, чым у іншых. Але кампаніі настолькі апантаныя фінансавымі паказчыкамі, што, паводле аналітыкаў з Уол-Стрыт, грошы, якія ім прыносяць супрацоўнікі, хутчэй пойдуць не на павышэнне заробкаў, а на інфраструктуру для ШІ.

Акрамя таго, кампаніі чамусьці сталі чакаць, што супрацоўнікі павінны працаваць даўжэй у імя канкурэнтаздольнасці саміх жа кампаній. Сузаснавальнік Google Сяргей Брын, напрыклад, лічыць ідэальным працаваць 60 гадзін на тыдзень.

Яшчэ адна праблема для ІТ-супрацоўнікаў у тым, што шмат кампаній не спяшаюцца запаўняць вакансіі і адкрываць новыя, нягледзячы на рост кліенцкай базы: частку руціннай чалавечай працы аўтаматызаваў штучны інтэлект. WSJ нядаўна пісаў пра менеджара Amazon Web Services, якому летась упершыню за дзесяць гадоў давялося сесці пісаць код, бо падначаленых, што рабілі гэта раней, у яго больш няма. Таксама выданне распавядала пра рэкрутарку з Meta, якую спачатку звольнілі, а потым зноў узялі на працу, але на іншых умовах — без павышэння заробку, прасоўвання і акцый. Аб’ём працы, якую яна цяпер выконвае, раней быў размеркаваны на некалькі чалавек.

Прадуктыўнасць, аптымізацыя, эфектыўнасць, скарачэнне выдаткаў — без гэтых слоў ужо складана ўявіць рыторыку тэхнакампаній. Таму часткова паспрыялі ініцыятывы Дональда Трампа і Маска, якія змагаюцца з марнатраўствам і праводзяць чысткі ў дзяржаўных органах ЗША.

Ва ўмовах турбулентнасці ў амерыканскай эканоміцы, асабліва на фоне мыт, і апантанасці ШІ, сітуацыя ў ІТ наўрад ці палепшыцца. Хутчэй за ўсё, кампаніі працягнуць эканоміць на ўсім і спрабаваць выціснуць з супрацоўнікаў максімум, заключае выданне.