Amazon звольніць каля 10 тысяч супрацоўнікаў перад святамі

Паводле даных The New York Times, кампанія плануе скараціць каля 10 тысяч чалавек. Пад скарачэнне патрапяць распрацоўшчыкі, напрыклад, тыя, што працуюць над галасавым памочнікам Alexa. Таксама звольняць супрацоўнікаў падраздзялення рознічнага гандлю і аддзела кадраў.

Выданне адзначае, што 10 тысяч — гэта каля 3% ад сталых супрацоўнікаў кампаніі і прыкладна 1% усёй працоўнай сілы Amazon, якая налічвае больш за 1,5 мільёна чалавек (у большасці сваёй яна складаецца з пагадзінных працаўнікоў). Скарачэнні пачнуцца перад сезонам перадсвяточных пакупак, калі звычайна набіраюць дадатковы персанал.

Раней іншыя кампаніі бігтэху таксама заявілі пра масавыя скарачэнні. Meta абвясціла пра першыя ў сваёй гісторыі масавыя звальненні. Кампанія скароціць 11 тысяч працаўнікоў з 87. Таксама Twitter пасля куплі Іланам Маскам звольніў больш за 3500 чалавек.