Амерыканскія ІТ-кампаніі просяць замежных супрацоўнікаў не пакідаць краіну — могуць не пусціць назад

Раней такую ж параду замежным спецыялістам давалі мясцовыя юрысты. Яны папярэджваюць, што падчас першага тэрміну Трампа рэзка ўзрасла колькасць адмоваў па візе H-1B для высокакваліфікаваных спецыялістаў, і тое ж самае можа здарыцца цяпер.

У юрыдычнай фірме Goeschl Law, якая спецыялізуецца на працоўнай іміграцыі і абслугоўвае ІТ-кампаніі, адзначаюць, што цяпер назіраецца «шмат трывогі і панікі». Там заяўляюць, што ўрад закручвае гайкі, і нельга прадказаць, якіх сюрпрызаў ад яго чакаць.

Напрыклад, Трамп скасаваў аўтаматычнае наданне амерыканскага грамадзянства асобам, народжаным на тэрыторыі краіны ад замежнікаў. Айцішныя імігранты баяцца, што іх будучыя дзеці могуць застацца без пашпарта.

Таксама амерыканскія ўлады пачалі ануляваць візы і грын-карты асобам, якія публічна выказвалі падтрымку ХАМАС і іншым арганізацыям, прызнаным тэрарыстычнымі. Гэта таксама можа закрануць замежных супрацоўнікаў ІТ-індустрыі ЗША.

Міграцыйная палітыка Трампа выклікала падзел у шэрагах яго прыхільнікаў. Яна адпавядае інтарэсам супрацоўнікаў-амерыканцаў, але тэхналагічныя кампаніі, што моцна залежаць ад каштоўных замежных кадраў, турбуюцца, што іх адток можа падарваць канкурэнтныя пазіцыі як саміх кампаній, так і ЗША на сусветнай ІТ-арэне.

Імігрантамі з’яўляюцца генеральныя дырэктары такіх тэхнагігантаў, як Google, Microsoft і Nvidia. На імігрантаў прыпадае палова фаўндэраў амерыканскіх «аднарогаў».

Па словах юрыстаў, улады сталі больш жорстка падыходзіць да разгляду заявак на візу H-1B. Замежным айцішнікам раяць сачыць за актуальнасцю сваіх дакументаў, быць асцярожнымі з пастамі ў сацсетках і звяртацца па дапамогу. З-за нечаканых змен палітыкі працэдура атрымання візы робіцца непрадказальнай, а супрацоўнікі ў пастаянным стрэсе. Таксама павялічваюцца тэрміны разгляду заявак на ПМЖ, асабліва для выхадцаў з Індыі.

Усё гэта ўплывае на працэсы ў ІТ-кампаніях. HR-спецыялісты ледзь паспяваюць падтрымліваць супрацоўнікаў, у якіх зніжаюцца матывацыя і прадуктыўнасць. Кампаніі спрабуюць паскорыць разгляд заявак на паўторныя візы і дапамагаюць кансультацыямі, але гэта патрабуе дадатковых рэсурсаў.