Apple адмовілася ад падтрымкі вэб-праграм на iPhone. ЕС гэта не спадабалася

Паводле слоў прадстаўніцы Еўракамісіі Леа Зубер, рэгулятар праводзіць праверку прапаноў аб захаванні нормаў заканадаўства. Раней Apple заявіла, што з выхадам iOS 17.4 адключыць падтрымку прагрэсіўных вэб-праграм (PWA) на iPhone. Яны перастануць працаваць як асобныя праграмы з уласнымі сховішчамі даных і апавяшчэннямі, а ператворацца ў закладкі для браўзера.

Кампанія лічыць, што гэтая мера задавальняе патрабаванні закона ЕС «Аб лічбавых рынках» (DMA), згодна з якім Apple мае забяспечыць на iOS паўнавартасную падтрымку браўзерных рухавікоў акрамя Safari Webkit. Пры гэтым падтрымка PWA з іншымі браўзерамі патрабуе «цалкам новай архітэктуры інтэграцыі», якую «немэтазгодна ажыццяўляць з улікам іншых патрабаванняў DMA», лічыць кампанія.