Apple дадасць ШІ-пошук ў Safari: людзі сталі менш гугліць

Старэйшы віцэ-прэзідэнт Apple па сэрвісах Эдзі Кью ў сваіх паказаннях у судзе заявіў, што, на яго думку, пошукавыя сістэмы на базе ШІ у выніку заменяць стандартныя сістэмы, такія як Google.

Кью паведаміў, што Apple разглядае магчымасць дадаць у Safari генератыўны пошук ад OpenAI або Perplexity AI у якасці опцый у будучыні. Паводле яго слоў, гэта дэманструе, як далёка прасунуліся генератыўныя сэрвісы. Раней у красавіку ChatGPT паведаміў пра больш як 1 мільярд вэб-запытаў штотыдзень.

У красавіку федэральны суд ЗША прызнаў, што Google незаконна дамінаваў на рынках рэкламных тэхналогій, і цяпер разглядае магчымыя санкцыі або захады супраць кампаніі. Адзін з ключавых аспектаў справы — практыка Google плаціць пастаўшчыкам платформаў, такім як Apple, за статус пошукавай сістэмы па змаўчанні.

Для Google такія ўгоды — спосаб павялічыць аб’ёмы пошуку і колькасць карыстальнікаў, а для Apple — прыбытковая крыніца даходу. Паводле СМІ, Google штогод выплачвае Apple прыкладна $20 мільярдаў за тое, каб быць пошукавай сістэмай па змаўчанні ў Safari. Гэта сума складае каля 36% даходаў Google ад пошукавай рэкламы, якая генеруецца праз Safari.

Аднак, паводле Кью, у красавіку ўпершыню назіралася зніжэнне колькасці пошукавых запытаў у Safari, што ён патлумачыў ростам выкарыстання ШІ сярод карыстальнікаў. Ён адзначыў, што патэнцыял для змен вельмі вялікі, бо з’яўляюцца новыя гульцы, якія падыходзяць да праблемы іншым спосабам.

Спалучэнне LLM з пошукам можа неўзабаве дазволіць эфектыўна выкарыстоўваць новыя тэхналогіі. Нягледзячы на хуткі прагрэс у галіне ШІ, Кью адзначыў, што пакуль што пошукавыя сэрвісы на базе ШІ «яшчэ недастаткова добрыя», каб цалкам замяніць традыцыйныя пошукавыя сістэмы.

Паводле віцэ-прэзідэнта Apple, скасаванне пагаднення паміж Google і Apple будзе мець вельмі сур’ёзныя наступствы для Google. Але нават без угоды Google можа захоўваць лідарскія пазіцыі ў Safari у кароткатэрміновай перспектыве.

Па словах Кью, у Apple цяпер «сапраўды няма выбару», бо Google усё яшчэ забяспечвае лепшы сэрвіс для кліентаў, і яны, хутчэй за ўсё, самі будуць шукаць яго, а ў такім выпадку Apple не атрымае сваю долю і не зможа ствараць новыя прадукты своечасова.