Apple шукае шчыліны, каб не выконваць патрабавання ЕС пра ўсталяванне чужога софту

Кампанія пацвердзіла, што на яе распаўсюджваецца дзеянне еўрапейскага антыманапольнага закона пра лічбавыя рынкі (DMA). Да 5 сакавіка 2024 года Apple мае прывесці свае палітыкі ў адпаведнасць з патрабаваннямі дакумента. Кампанія абавязаная дазволіць распрацоўшчыкам выкарыстоўваць чужыя плацежныя сістэмы пры аплаце лічбавага кантэнту і паслуг, дазволіць карыстальнікам усталёўваць праграмы не толькі з App Store, стварыць умовы для сумяшчальнасці iMessage з іншымі сэрвісамі для абмену паведамленнямі.

На думку 9to5Mac, да вызначанага тэрміну кампанія зможа выканаць толькі першы пункт патрабаванняў, рэалізацыя двух іншых можа зацягнуцца на гады. Фармулёўка DMA пра ўсталяванне софту з чужых крыніц мае агаворку, звязаную з бяспекай прылады. Apple зможа паспрабаваць даказаць, што прымус карыстальнікаў і распрацоўшчыкаў купляць і прадаваць праграмы толькі праз App Store — гэта адзіны спосаб абараніць іх ад шкодных і ашуканскіх праграм.

Таксама DMA мае на ўвазе, што Apple мае падзяліцца тэхнічнымі спецыфікацыямі iMessage з іншымі распрацоўшчыкамі. Такі абмен інфармацыяй не мае падрываць высокі ўзровень бяспекі і абароны даных. Выданне мяркуе, што Apple будзе наўмысна сабатаваць гэты працэс і падрыхтуе такі тэхнічны дакумент, які будзе максімальна бескарысны для іншых кампаній, і ў выніку яны не змогуць скарыстацца данымі.