Apple пагражае спыніць пастаўкі ў ЕС

DMA быў прыняты тры гады таму і рэгулюе працу найбуйнейшых лічбавых кампаній ад пашукавікоў і месэнджараў да крамаў аплікацый. Адно з патрабаванняў — забяспечыць сумяшчальнасць прадуктаў Apple з прыладамі старонніх вытворцаў. У прыватнасці, на iPhone павінны карэктна працаваць навушнікі іншых брэндаў. Apple сцвярджае, што гэта перашкаджае запуску некаторых функцый, напрыклад, імгненнага перакладу праз AirPods, таму што размовы могуць уцячы да канкурэнтаў, а гэта — пагроза канфідэнцыйнасці. У сувязі з законам Apple затрымлівала запуск і іншых функцый у Еўропе — напрыклад, вывядзення экранаў iPhone на ноўтбукі. Кампанія папярэджвае, што спіс абмежаванняў для еўрапейскіх карыстальнікаў будзе толькі расці.

Кампанія патрабуе адмяніць DMA або хаця б замяніць на больш адэкватныя нормы. Яна адзначыла, што пры цяперашніх правілах Apple Watch, выпушчаныя 10 гадоў таму, маглі б так і не выйсці ў ЕС. Асобна яна паскардзілася, што закон не распаўсюджваецца на Samsung, што стварае перадумову для несумленнай канкурэнцыі.

Apple таксама ўказала, што новыя правілы ўплываюць на доступ да аплікацый. Кампанія падкрэсліла, што праз староннія маркетплэйсы на iPhone ужо можна ўсталяваць парнаграфічныя аплікацыі, якія ніколі не дапускаліся ў App Store з-за рызык для дзяцей.

Гэта не першы канфлікт Apple з Бруселем. Раней у гэтым годзе кампанія аспрэчыла штраф у €500 млн за нібыта абмежаванне распрацоўшчыкаў, якія спрабавалі вывесці карыстальнікаў за межы App Store.

Паралельна на тэму выказаўся прэзідэнт ЗША Дональд Трамп. У жніўні ён пагражаў увесці пошліны супраць краін, якія «атакуюць амерыканскія тэхналагічныя кампаніі» праз лічбавыя падаткі і рэгуляванне. Ён сцвярджае, што падобныя законы «даюць поўны карт-бланш кітайскім кампаніям», і гэтаму «трэба тэрмінова пакласці канец».