Apple распрацоўвае хатніх робатаў замест электракараў

Ідэя знаходзіцца на ранняй стадыі. Інжынеры Apple задумаліся наконт стварэння робата, які будзе перасоўвацца па хаце. Таксама разглядаецца стварэнне настольнага гаджата з дысплэем, які верціцца — гэта будзе яшчэ больш прасунуты праект, чым мабільны робат.

Адной з асаблівасцяў рабатызаванага дысплэя будзе імітацыя рухаў галавы карыстальніка, напрыклад, кіўкоў і іншых рэакцый, у гутарцы ў FaceTime, а таксама набліжэнне асобнага чалавека з групы падчас відэазванка. Праект прыцягнуў увагу топ-менеджараў Apple некалькі гадоў таму, але паўсталі спрэчкі з нагоды яго мэтазгоднасці.

Робататэхнікай, паводле слоў крыніц выдання, кампанія зацікавілася ў 2019 годзе. Тады праект узначальваў Даг Філд, які цяпер займае пасаду топ-менеджара ў Ford. Ён працаваў разам з іншымі распрацоўшчыкамі прадуктаў для дома, напрыклад, ціхіх хатніх дронаў. Пасля яго сыходу ў 2021 годзе ў напрамку робататэхнікі Apple сканцэнтравалася на хатніх прадуктах — адным з іх быў робат для выканання хатняй працы накшталт мыцця посуду і відэазванкоў. Але ідэю адклалі ў доўгую скрыню праз інжынерныя праблемы.

Ці дойдуць робаты Apple да спажыўцоў, незразумела, але кампанія заклала асновы такіх праектаў. Вядома, што прынамсі адзін інжынер з закрытага аўтамабільнага праекта перайшоў у каманду робататэхнікаў, а аперацыйную сістэму SafetyOS, якая мелася забяспечваць працу беспілотнага функцыяналу, тэхнічна можа быць падагнаная пад робатаў.