Apple стане радзей выдаваць бонусы супрацоўнікам некаторых карпаратыўных падраздзяленняў і будзе старанней скарачаць выдаткі на тле макраэканамічнай нявызначанасці, расказалі крыніцы Bloomberg. Таксама кампанія абмяжуе найманне новых кадраў і пошук замены на пазіцыі супрацоўнікаў, якія сыходзяць.
Apple стане радзей выдаваць бонусы супрацоўнікам некаторых карпаратыўных падраздзяленняў і будзе старанней скарачаць выдаткі на тле макраэканамічнай нявызначанасці, расказалі крыніцы Bloomberg. Таксама кампанія абмяжуе найманне новых кадраў і пошук замены на пазіцыі супрацоўнікаў, якія сыходзяць.
Звычайна Apple раздавала бонусы і павышэнні адзін альбо два разы на год (у красавіку і кастрычніку) у залежнасці ад падраздзялення. Цяпер жа ўсе будуць атрымліваць бонусы і павышэнні толькі раз на год — у кастрычніку, а ў наступным месяцы іх не будзе. Раней на гадавы графік ужо перайшла большасць падраздзяленняў «яблычнай» кампаніі, у тым ліку па распрацоўцы софту і сэрвісаў, на паўгадавым заставаліся супрацоўнікі аперацыйнага аддзела, рытэйлу і шэрага іншых груп.
Як адзначае Bloomberg, Apple загадзя не папярэдзіла супрацоўнікаў, што ў красавіку яны не атрымаюць грошай, на якія, магчыма, вельмі разлічвалі. Але, з іншага боку, гэта можа дапамагчы ўтрымаць тых, хто хацеў звольніцца пасля атрымання красавіцкай выплаты.
Навіна тычыцца інжынераў ды іншых шараговых супрацоўнікаў, а таксама менеджараў сярэдняга звяна. Больш высокапастаўленыя супрацоўнікі звычайна атрымліваюць прэміі раз на квартал.
Apple з’яўляецца найбуйнейшай кампаніяй у свеце паводле памеру рынкавай капіталізацыі. Скарачаць выдаткі яна пачала мінулага ліпеня на тле росту інфляцыі і рызыкі эканамічнага спаду. Apple атрымалася пазбегнуць масавых звальненняў, якія пракаціліся па іншых тэхнагігантах, але ёй таксама давялося перагледзець бюджэт, знізіць планы па колькасці штату і прыпыніць найманне ў некаторых сегментах.
Таксама Apple сутыкнулася з падзеннем продажаў: выручка ў святочным квартале знізілася на 5% — больш, ніж прагназавалі аналітыкі з Уол-Стрыт. Гэта было звязана з затрымкамі ў вытворчасці айфонаў і нізкім попытам на яе камп’ютары і прылады на руку. Аналагічнае падзенне продажаў чакаецца паводле вынікаў бягучага квартала.
Акрамя гэтага, Apple скараціла выдаткі супрацоўнікаў на працоўныя паездкі, звольніла некаторых падрадчыкаў і ўзмацніла кантроль за наведвальнасцю офіса. Цяпер супрацоўнікі маюць прысутнічаць на працоўным месцы тры разы на тыдзень. Некаторыя лічаць узмацненне жорсткасці ўліку прыкметай таго, што кампанія шукае кандыдатаў на звальненне сярод тых, хто не выконвае патрабавання.
А супрацоўнікі ў рытэйле, якія працуюць не на поўную стаўку, кажуць, што іх сталі прасіць працаваць больш гадзін і дзён, ніж было дамоўлена. Яны лічаць, што так іх спрабуюць падштурхнуць да звальнення на ўласнае жаданне.
Рэлацыраваліся? Цяпер вы можаце каментаваць без верыфікацыі акаўнта.