Apple забараніла супрацоўнікам карыстацца ChatGPT
Apple забараніла супрацоўнікам выкарыстоўваць ChatGPT ды іншыя чужыя інструменты на базе штучнага інтэлекту, даведаўся Wall Street Journal. Тым часам яна сама займаецца распрацоўкай аналагічных тэхналогій.
«Яблычная» кампанія асцерагаецца выпадковых зліваў прыватнай канфідэнцыйнай інфармацыі з боку супрацоўнікаў, якія выкарыстоўваюць АІ-сэрвісы. Таксама ім параілі не карыстацца інструментам для напісання кода GitHub Copilot.
Падобныя праграмы адпраўляюць даныя, якія ўводзяць юзеры, на серверы распрацоўшчыкаў для далейшай трэніроўкі і паляпшэння мадэляў, што ляжаць у іх аснове. Гэта стварае рызыку ўцечак даных, якія потым будзе немагчыма адабраць або выдаліць.
У сакавіку OpenAI прыйшлося часова абмежаваць доступ да ChatGPT пасля таго, як праз баг карыстальнікі маглі бачыць загалоўкі чужых дыялогаў. Пазней распрацоўшчыкі дадалі магчымасць адключаць гісторыю чатаў.
Раней такую ж забарону ўвяла Samsung і шэраг іншых кампаній. Amazon таксама заклікае супрацоўнікаў для генерацыі кода карыстацца не ChatGPT, а ўнутраным АІ-інструментам.
Читать на dev.by