Аддзел навін bel 8 красавіка 2025, 18:09

Адзін з рэйтынгаў пашпартоў улічвае ўспрыманне краіны ў свеце і асабістыя свабоды. Беларусь у ім яшчэ ніжэй, чым у звычайных топах.

Кансалтынгавая фірма Nomad Capitalist абнавіла штогадовы рэйтынг самых моцных пашпартоў свету, паведамляе CNBC. У адрозненне ад большасці падобных даследаванняў, якія ацэньваюць пашпарты па магчымасці бязвізавага ўезду ў іншыя краіны, ён улічвае шэраг іншых важных параметраў.

Пакінуць каментарый

Кансалтынгавая фірма Nomad Capitalist абнавіла штогадовы рэйтынг самых моцных пашпартоў свету, паведамляе CNBC. У адрозненне ад большасці падобных даследаванняў, якія ацэньваюць пашпарты па магчымасці бязвізавага ўезду ў іншыя краіны, ён улічвае шэраг іншых важных параметраў.

Дзявятае выданне рэйтынгу ўключае 199 краін і тэрыторый. Для яго складання выкарыстоўваліся 20 крыніц — ад матэрыялаў падатковых службаў да даклада World Happiness Report і Індэкса чалавечага развіцця ААН.

Nomad Capitalist улічвае пяць крытэрыяў:

бязвізавы рэжым — 50%;
падаткаабкладанне — 20%;
ўспрыманне краіны ў свеце — 10%;
магчымасць атрымання падвойнага грамадзянства — 10%;
асабістыя свабоды (свабода прэсы, вайсковы абавязак і іншае) — 10%.

Гэтыя фактары даюць больш поўнае ўяўленне пра «сапраўдную вартасць» грамадзянства і тое, грамадзянам якой краіны насамрэч жывецца камфортна ва ўсіх сэнсах.

Паводле версіі Nomad Capitalist, самы моцны пашпарт у свеце ў Ірландыі. Яна ўпершыню заняла першае месца ў гэтым рэйтынгу, а ў 2020 годзе падзяліла яго з Люксембургам і Швецыяй. Аўтары адзначылі высокую міжнародную рэпутацыю Ірландыі, спрыяльную для бізнесу падатковую палітыку і гнуткасць грамадзянства.

Беларусь у спісе знаходзіцца на далёкім 125 месцы, значна саступаючы суседзям. Латвія заняла 19 месца, Літва — 29-е, Польшча — 32-е, Украіна — 73-е, а Расія — 95-е.

Для параўнання, у пашпартным рэйтынгу Henley & Partners Беларусь апярэджваюць 113 краін, а ў рэйтынгу Passport Index наш пашпарт займае 112 месца.