Беларусь ужо колькі гадоў запар страчвае па дзесяць пазіцый у рэйтынгу Coursera

Сёлета Беларусь заняла 43-е месца. У мінулым годзе мы былі на 33-й пазіцыі, у пазамінулым — на 21-й, а перад тым — на 12-й. У еўрапейскім рэйтынгу Беларусь цяпер на 27-й пазіцыі — тры гады таму была 22-й, 16-й і 9-й.

Па ўзроўні кампетэнтнасці слухачоў у трох асноўных напрамках (Business, Technology і Data Science) Беларусь застаецца сярод «канкурэнтаздольных» краін — гэта другая з чатырох груп, на якія аўтары падзяляюць краіны. Два гады таму мы ўваходзілі ў топавую групу перадавых краін.

Сёлета ў дакладзе з’явіўся і новы індыкатар — AI Maturity Index. Ён паказвае, якія краіны лепш за ўсё падрыхтаваныя да ўкаранення ШІ-інавацый і прымянення ведаў у гэтай сферы на практыцы. Акрамя даных пра слухачоў Coursera, у ім улічваліся метрыкі МВФ і АЭСР, звязаныя з ШІ-даследаваннямі і інавацыямі. Беларусь у гэтым індэксе апынулася на 71-м радку.

Лідарства ў сусветным спісе Coursera захоўвае Швейцарыя. Беларусь апярэджваюць, напрыклад, Казахстан (37), Польшча (34), Літва (29) і Латвія (24). Поўны даклад можна прачытаць па спасылцы.