Беларуса будуць судзіць з-за Маска ў Варшаве

Мастака затрымалі ў канцы студзеня падчас працы над графіці. Яно адлюстроўвала чалавека, які «зігуе», падобнага на амерыканскага бізнесмена Ілана Маска, і суправаджалася надпісам «Make Poland great for poles again».

Цяпер беларуса могуць пакараць па артыкуле аб наўмысным пашкоджанні маёмасці (пункт 1 артыкула 288 Крымінальнага кодэкса Польшчы). Ён папрасіў выданне не раскрываць сваё прозвішча.

У пастарунку ў яго ўзялі адбіткі пальцаў і сліну, запісалі асабістыя дадзеныя. У праваахоўнікаў узніклі прэтэнзіі да дакумента Максіма —  яго часовае пасведчанне асобы замежніка, якое выдаюць пры падачы на міжнародную абарону, было пратэрмінаванае. Паводле словаў мастака, у паліцыі яго прымушалі падпісаць дакумент з абвінавачваннем у нанясенні шкоды на 2 тысячы злотых і малюнку чалавека, які ўзняў руку ў «рымскім салюце».