Беларусаў вырашылі не пазбаўляць літоўскага ВНЖ за частыя паездкі дадому

За праект закона прагаласавалі 115 дэпутатаў, супраць не было нікога, адзін дэпутат устрымаўся. «Пры прыняцці Сейм прыняў рашэнне не ўводзіць новыя, больш строгія абмежаванні для грамадзян Беларусі», — заявілі ў Сейме.

Такім чынам, прапанова ануляваць ВНЖ беларусаў, калі яны наведваюць Беларусь або Расію часцей за адзін раз на тры месяцы, падтрымана не была. Але цяпер гэта мера будзе дзейнічаць у дачыненні да расіян. Яна ўступіць у сілу з 3 траўня.

«Закон дапоўнены палажэннем пра тое, што дазвол на часовае пражыванне, выдадзены грамадзяніну Расіі ў Літве, будзе ануляваны, калі будзе ўстаноўлена, што ён або яна здзяйснялі паездкі ў Расію або Беларусь больш як адзін раз цягам апошніх 3 каляндарных месяцаў», — гаворыцца ў паведамленні Сейма.

Дадзенае палажэнне не будзе прымяняцца ў выпадках, калі расіяніну давялося ехаць у гэтыя краіны па аб’ектыўных, не залежных ад яго прычынах, а таксама да членаў экіпажаў транспартных кампаній.