Беларусаў абавязалі паведамляць пра працу ў дзяржустановах і службу ў арміі пры ўездзе ў Латвію

Папраўкі ўступяць у сілу 1 верасня. Іх унесла ў Сейм парламенцкая Камісія па нацыянальнай бяспецы, падкрэсліўшы, што Расія і Беларусь не адмовяцца ад выкарыстання грамадзян дружалюбных ім краін для выведкі і іншых шкоднасных дзеянняў супраць ЕС і краін-удзельніц НАТА.

Папраўкі скіраваныя перш за ўсё на Беларусь, Расію і краіны СНД — пад дзеянне закона не трапяць грамадзяне дзяржаў ЕС, НАТА, Арганізацыі эканамічнага супрацоўніцтва і развіцця, Еўрапейскай эканамічнай зоны, Швейцарыі і Бразіліі.

Асобы, на якіх распаўсюджваецца закон, павінны будуць за 48 гадзін да ўезду ў Латвію пазначыць мэту паездкі, меркаваны тэрмін знаходжання, месца пражывання, маршрут перамяшчэння і кантактную інфармацыю. Таксама спатрэбіцца інфармацыя пра сферу занятасці і пра тое, ці не прэтэндаваў грамадзянін трэцяй краіны на выбарчую пасаду, ці не мае ён цяпер або ў мінулым статусу дзяржаўнага ці муніцыпальнага службоўца. Трэба будзе падаваць звесткі пра службу ва ўзброеных сілах, спецслужбах, памежнай ахове, мытні, установах унутраных спраў, юрыдычных або замежных ведамствах.

За непадаванне або падаванне ілжывых звестак пагражае штраф да €2 тысяч.

Невядома, якім чынам ва ўмовах свабоднага перамяшчэння ў межах ЕС і Шэнгенскай зоны будзе ажыццяўляцца такі кантроль. Праверкі праводзяцца ў аэрапорце і пры перасячэнні сухапутных межаў Латвіі з Расіяй і Беларуссю. Але межы з Літвой і Эстоніяй адкрытыя, і тэарэтычна грамадзяне трэціх краін могуць накіравацца, напрыклад, з Венгрыі, якая не ажыццяўляе праверку бяспекі грамадзян трэціх краін, праз Польшчу ў Літву, а потым у Латвію.