Безас кажа, што ШІ — гэта бурбалка, але ўсё будзе добра

Безас адзначыў, што рынак ШІ мае класічныя рысы бурбалкі: адарваныя ад рэальнасці катыроўкі і ацэнкі, інвестары раскідваюцца грашыма, а адрозніць перспектыўныя ідэі ад асуджаных амаль нерэальна.

«Гэта свайго роду прамысловая бурбалка. Інвестарам сярод усяго гэтага шуму складана зразумець, якія ідэі добрыя, а якія дрэнныя», — адзначыў Безас. Ён згадаў, як абрынуліся акцыі Amazon падчас краху доткамаў — са $113 да $6, хаця ўсе фундаментальныя паказчыкі кампаніі станавіліся лепшымі.

«Нашыя супрацоўнікі нерваваліся, ім званілі бацькі і пыталіся, ці ўсё з імі ў парадку. Але ўсе да адзінай бізнес-метрыкі паляпшаліся. Калі кошт акцый цалкам адарваны ад фундаментальных паказчыкаў, гэта прыкмета бурбалкі», — сказаў Безас. Ён меў на ўвазе невялікія кампаніі, у якіх усяго некалькі супрацоўнікаў, але якія прыцягваюць вялізныя інвестыцыі. Кажа, што гэты трэнд «вельмі незвычайны» і паказвае, што рынак моцна перагрэты.

Пры гэтым прадпрымальнік лічыць, што спекулятыўная актыўнасць вакол ШІ не змяншае патэнцыял тэхналогіі. «ШІ зменіць усе галіны эканомікі. Грамадства атрымае ад яго гіганцкую карысць», — канстатаваў Безас.

Ён дадаў, што не варта разглядаць бурбалкі толькі ў негатыўным ключы. «Калі пыл асядзе, стануць бачныя пераможцы. Іх вынаходствы пойдуць на карысць грамадству», — адзначыў Безас.