БДУ адкрывае «элітарную» школу прыродазнаўчых навук і тэхналогій

Новая арганізацыя будзе займацца апераджальнай падрыхтоўкай высокакласных спецыялістаў. Даручэнне адкрыць яе даў Аляксандр Лукашэнка ў мінулым годзе.

Студэнтаў будуць рыхтаваць па пяці эксперыментальных праграмах:

• інтэлектуальныя радыёфізічныя сістэмы і тэхналогіі;
• прыкладная фізіка і інфарматыка;
• прыкладная матэматыка, механіка і інфарматыка;
• фундаментальная і прыкладная хімія;
• фундаментальная геаграфія.

Рэктар БДУ Андрэй Кароль адзначыў, што ў апошнія гады ВНУ інтэнсіўна абнаўляе адукацыйныя праграмы і ўкараняе міждысцыплінарныя падыходы, каб развіваць у студэнтаў гнуткія і актуальныя кампетэнцыі. «Арганізацыя навучальнага працэсу ў школе будзе грунтавацца на абсалютна новай для Беларусі траекторыі, якая спалучае ў сабе тры галоўныя прынцыпы: індывідуалізацыю, узмоцненую інтэнсіўнасць і практыкаарыентаванасць», — падзяліўся ён.

Навучанне стартуе ў 2026 годзе. Вучыцца студэнты будуць 5 гадоў. На першых трох курсах будуць паглыблена праходзіць прыродазнаўчыя дысцыпліны. На старэйшых дадасца рэгулярная практыка ў базавых арганізацыях з уцягваннем у вытворчы працэс, сістэматычнае наведванне прадпрыемстваў і навуковых цэнтраў, стажыроўкамі ў Беларусі і за мяжой.

Даследчыя праекты і распрацоўкі студэнтаў будуць укараняць у вытворчасць. Каля паловы заняткаў прадугледжваюць індывідуальны падыход да студэнтаў. Выкладаць будуць эксперты і навукоўцы топавых навукова-адукацыйных устаноў краіны. Частку дысцыплін будуць чытаць на англійскай мове з прыцягненнем замежных спецыялістаў. Студэнтам усіх спецыялізацый дадуць комплексныя веды па кожным напрамку падрыхтоўкі: напрыклад, фізік будзе ведаць геаграфію, а хімік — інфармацыйныя тэхналогіі. «На выхадзе гэта дазволіць атрымаць унікальнага, канкурэнтаздольнага і запатрабаванага спецыяліста», — патлумачылі ў прэс-службе.

Там дадалі, што школа арыентавана «не на масавую, а на элітарную падрыхтоўку адоранай моладзі» — пераможцаў алімпіяд, выпускнікоў ліцэя БДУ і дзіцячага тэхнапарка. Ім для залічэння трэба будзе прайсці сумоўе, астатнія акрамя яго будуць здаваць іспыт.

БДУ патрапіў у топ лепшых ВНУ планеты (але ёсць нюанс)

Па тэме

БДУ патрапіў у топ лепшых ВНУ планеты (але ёсць нюанс)

Паступіць у ВНУ без іспытаў цяпер можна праз дзіцячы тэхнапарк

Па тэме

Паступіць у ВНУ без іспытаў цяпер можна праз дзіцячы тэхнапарк