БДУІР закрыў набор на бюджэт. Конкурс вышэйшы, ФКСіС па-ранейшаму №1, але ёсць нечаканае

Агульны планавы набор студэнтаў на дзённую форму застаўся фактычна такім жа, як і ў 2024. Сёлета ён складае 2105 чалавек (у 2024 — 2100). Пры гэтым колькасць месцаў на дзённую бюджэтную форму навучання скарацілася з 1190 да 1170.

На выдзеленыя бюджэтныя месцы абітурыенты падалі 1493 заявы — на 5% больш, чым у 2024 годзе.

Папулярныя/непапулярныя факультэты

Самым папулярным у БДУІР застаўся факультэт камп’ютарных сістэм і сетак. Аднак колькасць ахвотных вучыцца на ФКСіС рэзка скарацілася. Калі ў мінулым годзе абітурыенты падалі 470 заяў, то сёлета на 22% менш — толькі 364.

Таксама скарацілася колькасць заяў ад ахвотных вучыцца на факультэце інфармацыйных тэхналогій і кіравання (на 5%) і інжынерна-эканамічным факультэце (на 7%).

Пры гэтым рэзка вырас інтарэс да спецыяльнасцяў, якім навучаюць на факультэтах інфармацыйнай бяспекі, а таксама радыётэхнікі і электронікі. Прыёмная камісія ФІБ прыняла ад абітурыентаў у 1,5 разы больш заяў, чым у мінулым годзе, на ФРІЭ колькасць пададзеных заяў вырасла ў 2 разы.

Конкурс

Папярэдне агульны конкурс на дзённую бюджэтную форму навучання ў БДУІР (без уліку мэтавікоў) склаў 1,35 чалавек на месца. У мінулым годзе ён быў ніжэй — 1,25 чалавек на месца.

Зыходзячы са статыстыкі, сёлета 151 чалавек паступаў без уступных экзаменаў, яшчэ 4 — па-за конкурсам. У мінулым годзе без уступных экзаменаў паступалі 140 чалавек і яшчэ 10 — па-за конкурсам.

Папулярныя і непапулярныя спецыяльнасці

Сёлета, як і ў папярэднія два гады, найбольш заяў было пададзена ад ахвотных навучацца спецыяльнасці «праграмная інжынерыя» (ФКСіС) — 181 на 40 месцаў (яшчэ 15 месцаў зарэзервавалі для мэтавікоў). Конкурс склаў 4,5 чалавека на месца (без уліку мэтавікоў). Між тым, для параўнання, у мінулым годзе абітурыенты падалі на 50% больш заяў — 270.

Таксама ў топе самых папулярных спецыяльнасцяў — «сістэмы і сеткі інфакамунікацый» (103 заявы на 105 месцаў) і «электронныя сістэмы і тэхналогіі» (101 заява на 103 месцы).

Зыходзячы са статыстыкі пададзеных заяў самы вялікі конкурс склаўся на ФІТУ сярод ахвотных навучацца спецыяльнасці «інфармацыйныя сістэмы і тэхналогіі». На 14 бюджэтных месцаў абітурыенты падалі 78 заяў. Конкурс склаў 5,5 чалавек на месца. Дарэчы, у мінулым годзе ён быў яшчэ вышэй — амаль 7 чалавек на месца: на 15 выдзеленых месцаў прэтэндавалі 103 чалавекі.

Сёлета БДУІР адкрыў набор студэнтаў на новую спецыяльнасць — «звышвысокачастотныя сістэмы». Тэрмін навучання складзе шэсць гадоў. Выпускнікі атрымаюць інжынерную кваліфікацыю і ступень магістра. Але, зыходзячы са статыстыкі, новая спецыяльнасць не выклікала вялікага ажыятажу. На 25 бюджэтных месцаў апынулася толькі 9 заявак. Гэта антырэкорд сярод усіх спецыяльнасцяў.

Але, нагадаем, што ў статыстыцы, якую абнародаваў БДУІР, колькасць пададзеных заяў адлюстроўваецца па першай спецыяльнасці, пазначанай абітурыентамі ў заяве. Пры канчатковым залічэнні ўсе бюджэтныя месцы будуць размеркаваны.