Бігтэх раздае гучныя абяцанні пра ШІ, а пасля спешна выдаляе рэкламу

Нацыянальны рэкламны аддзел (National Advertising Division, NAD), які ўваходзіць у Бюро па паляпшэнню дзелавой практыкі (Better Business Bureau), правёў расследаванне ў дачыненні маркетынгавых матэрыялаў найбуйнейшых ІТ-кампаній, каб ацаніць, ці не ўводзяць яны карыстальнікаў у зман адносна магчымасцяў і даступнасці новых ШІ-функцый.

У ходзе праверкі высветлілася, што Apple, напрыклад, на сваім сайце адзначала некаторыя яшчэ не выпушчаныя функцыі як «даступныя зараз», пры гэтым дробны шрыфт з агаворкамі быў недастаткова прыкметны. У адказ кампанія ўзмацніла папярэджанні аб тым, што новыя магчымасці Siri пакуль знаходзяцца ў распрацоўцы, і выдаліла рэкламны ролік з Бэлай Рэмсі, у якім дэманстравалася яшчэ не рэалізаваная функцыя.

Google прыбрала з Youtube рэкламнае відэа, у якім асістэнт Gemini паказваў свае здольнасці, пасля пачатку расследавання наконт магчымага перабольшвання хуткасці і эфектыўнасці прадукта. Цяпер ролік даступны толькі ў блогу кампаніі з тлумачэннем сцэнарыяў, што ўжываліся.

Microsoft скарэктавала рэкламныя матэрыялы аб функцыі Business Chat у Copilot, прызнаўшы, што не ўсе магчымасці рэалізаваны так «бясшоўна», як было заяўлена. Таксама кампанія дадала дысклеймеры да даследаванняў эфектыўнасці, удакладніўшы, што дадзеныя адлюстроўваюць суб’ектыўныя меркаванні карыстальнікаў, а не аб’ектыўныя паказчыкі.

Samsung пагадзілася адмовіцца ад сцвярджэння, што яе «разумная» лядоўня аўтаматычна распазнае ўвесь змест — высветлілася, што тэхналогія здольна вызначаць толькі абмежаваны набор прадуктаў і толькі пры добрым асвятленні.

Эксперты адзначаюць: па меры пранікнення ШІ ў паўсядзённае жыццё карыстальнікаў паток маркетынгу з сумнеўнымі абяцаннямі будзе толькі расці. «Калі вы падаяце ШІ як магію, непазбежна з’явіцца скепсіс і нагляд», — лічыць прафесар Джордж Хойдорфер з Універсітэта Нью-Хейвена.