Бігтэхі губляюць АІ-спецыялістаў — яны сыходзяць у стартапы або засноўваюць свае

Нягледзячы на тое, што ўсе тры тэхнагіганты абвясцілі штучны інтэлект сваім прыярытэтам і ўліваюць у тэхналогію велізарныя грошы, іх супрацоўнікі пераходзяць у стартапы або засноўваюць свае. Гэта дазваляе ім хутчэй выводзіць прадукты на рынак і ў выпадку поспеху атрымліваць большую аддачу.

Паводле слоў венчурнага інвестара Вінада Хослы, цяпер многія былыя супрацоўнікі Google, Meta і Microsoft пітчаць яму свае новыя стартапы — асабліва ў галіне АІ. «Дрэнныя часы для бігтэху — гэта выдатны час для стартапаў, пра якія вы пачуеце гадоў праз пяць», адзначае ён, дадаючы, што Meta і Google абмяжоўваюць фінансаванне толькі прасунутымі праектамі, і гэта прымусіць людзей шукаць альтэрнатывы. «Найлепшыя з іх запускаюць стартапы, бо імі значна ў большай ступені рухае місія, ніж грошы», — кажа Хосла.

Тэхнагіганты зазвычай вельмі павольна выкочваюць на рынак вялікія эксперыментальныя АІ-праекты. Акрамя таго, супрацоўнікам на такіх праектах даводзіцца мірыцца з тым, што фокус заўсёды на ўжо існых паспяховых прадуктах і напрамках, напрыклад, YouTube для Google і рэклама для Meta. Раней кампаніі маглі больш дазволіць сабе выдаткоўваць на эксперыменты. Паводле слоў аднаго з менеджараў Meta, пасля першага раўнда звальненняў супрацоўнікі сталі раіць адно аднаму знайсці новыя мэты па-за кампаніяй, а не чакаць новых скарачэнняў.

Стартапы, заснаваныя выхадцамі з бігтэхаў, ужо набіраюць папулярнасць. Напрыклад, экс-гуглеры запусцілі чатбот Character AI, які імітуе гутаркі са знакамітасцямі, інструмент Cohere, які спрашчае выкарыстанне вялікіх моўных мадэляў, і лабараторыя машыннага навучання Adept. Іх фаўндары працавалі над ключавымі для Google тэхналогіямі, напрыклад, моўнай мадэллю LaMDA, і былі аўтарамі найважнейшых яе даследчых работ.

«Практычна няма прыкладаў вельмі буйных інавацый, крыніцай якіх была б буйная арганізацыя. Гэтая прадпрымальніцкая экасістэма мае найважнейшае значэнне для прагрэсу», — сказаў на заканчэнне Хосла.