У ІТ і сувязі праз пяць гадоў «памірае» амаль палова адкрытых кампаній

Актыўныя кампаніі

Па выніках 2023 года Белстат налічыў у Беларусі амаль 107 тысяч актыўных кампаній ва ўсіх галінах. 

У ІТ і сувязі ў 2023 годзе было больш за 4 тысячы такіх бізнэсаў, або 3,8% ад агульнай колькасці. Па колькасці актыўных кампаній сектар «інфармацыя і сувязь» заняў 9 месца сярод асноўных відаў дзейнасці. 

Новыя кампаніі

За мінулы год у Беларусі з’явілася больш за 10,5 тыс. новых («народжаных») прадпрыемстваў. Гэта новыя кампаніі, у якіх з’явіліся наёмныя работнікаў і (або) абарот, якія перавышаюць нулявое значэнне.

У ІТ і сувязі такіх кампаній выявілася каля 340, або 3,2% ад агульнай колькасці. Па гэтым паказчыку сектар «інфармацыя і сувязь» таксама быў на 9 месцы сярод асноўных відаў дзейнасці. 

Таксама Белстат палічыў «узровень нараджальнасці» кампаній у розных сектарах за апошнія 9 гадоў (ад 2015 года).

Мяркуючы з даных афіцыйнай статыстыкі, ад 2015 года ў ІТ-сектары назіраўся ўсплёск з’яўлення новых бізнэсаў, якія не проста рэгістраваліся юрыдычна, але і развіваліся (пашыралі штаты, атрымлівалі выручку).

Пік прыйшоўся на 2018 год: суадносіны новых ІТ-кампаній да колькасці ўжо дзейных (актыўных) былі рэкорднымі — 20,6%.

Але ўжо ад 2019 года сітуацыя пачала мяняцца. А апошнія два гады (2022 і 2023) былі самымі правальнымі.

Верагодна, гэта ў тым ліку звязана з рэлакейтам (сыходам) ІТ-бізнэсаў з краіны. Хутчэй за ўсё скарацілася не толькі колькасць новых ІТ-кампаній, але і ў цэлым колькасць актыўных.

Узровень выжывальнасці ў ІТ

Яшчэ ў 2020 годзе кампаніі ІТ і сувязі лічыліся самымі «выжывальнымі» сярод усіх бізнэсаў. Менавіта ў гэтым сектары быў самы высокі паказчык на працягу пяці гадоў — большы за 60%. То-бок праз пяць гадоў ад моманту адкрыцця 60% кампаній працягвалі актыўную дзейнасць, «памірала» менш за 40% ІТ-бізнэсаў. 

Але за апошнія тры гады сітуацыя памянялася. Паводле звестак Белстата, у ІТ і сувязі «выжывае» ўжо менш за 53% кампаній. Прынамсі пра гэта сведчыць статыстыка за апошнія пяць гадоў. З 700+ новых кампаній, адкрытых у 2018 годзе, да 2023 года «выжыла» толькі 300+ кампаній.