Блогер зрабіў свой трэйлер GTA VI. Фанаты гульні ў захапленні

Блогер 12th Hour раней стаў вядомы дзякуючы ролікам пра Fortnite. У сакавіку ён абвясціў пра планы выпусціць трэйлер у стылі GTA VI, выкарыстоўваючы рухавік Unreal Engine 5, Blender і ўласныя матэрыялы. Карыстальнік апублікаваў на сваім канале дзвюххвілінны ролік фанацкай версіі GTA VI, створанай на матывы маштабнай уцечкі, якая адбылася летась у верасні.

Падзеі ў роліку адбываюцца ў Вайс-Сіці, гісторыя прысвечаная двум галоўным героям (мужчыну і жанчыне), якім для захопу горада спатрэбілася дапамога адно аднаго. У роліку паказваюцца рабаванні, дарагія машыны, пагоні з удзелам паліцэйскіх. Для большай аўтэнтычнасці 12th Hour прыцягнуў акцёраў для прафесійнай агучкі.

Фанаты гульні былі ў захапленні ад відэа — ролік сабраў звыш 80 тысяч лайкаў. У каментарах карыстальнікі ацанілі аб’ём і якасць працы, адзін з іх напісаў: «Rockstar, найміце гэтага чалавека». Паводле даных інсайдараў, наступная гульня GTA паступіць у продаж ад 1 красавіка 2024 года да 31 сакавіка 2025 года.