Bloomberg: расійскія хакеры гадамі шпіёнілі за ўладай і эканомікай у Грузіі

Расійскія хакеры, звязаныя з ГРУ і ФСБ, цягам некалькіх гадоў пранікалі ў ключавыя дзяржаўныя і інфраструктурныя сістэмы Грузіі, уключаючы Міністэрства замежных спраў, Міністэрства фінансаў, Цэнтральны банк і асноўныя энэргетычныя і тэлекамунікацыйныя кампаніі, паведамляе Bloomberg. Атакі працягваліся ад 2017 да 2020 года, узломы дазволілі расійскім агентам збіраць інфармацыю і патэнцыйна кіраваць крытычнай інфраструктурай краіны.

Паводле даных агенцтва, ГРУ ўзламала Цэнтральную выбарчую камісію Грузіі і, верагодна, атрымала доступ да яе электроннай пошты. Хакеры таксама праніклі ў сістэмы медыяарганізацый, такіх як Imedi і Maestro, а таксама ў IT-сістэмы грузінскай нацыянальнай чыгуначнай кампаніі, якія заставаліся даступныя хакерам больш за два гады. У дакументах, паказаных Bloomberg, згадваецца пра ўзлом сістэм электрасеткавых кампаній, такіх як Telasi: хакеры атрымалі доступ да ўнутраных камер і адсочвалі працу супрацоўнікаў у рэальным часе.

ФСБ арганізавала ўтоеную аперацыю супраць Міністэрства замежных спраў, атрымаўшы доступ да электроннай перапіскі высокапастаўленых чыноўнікаў і інфармацыі, якая захоўваецца ў грузінскіх амбасадах ва ўсім свеце. Хакерская група Turla, вядомая сваімі аперацыямі і звязаная з ФСБ, атакавала консульствы і амбасады Грузіі, уключаючы прадстаўніцтвы на Кіпры, у балтыйскіх дзяржавах, Расіі і іншых краінах. Грузінскія ўлады, паводле звестак еўрапейскіх чыноўнікаў, былі дасведчаныя аб некаторых расійскіх хакерскіх атаках дзякуючы дапамозе заходніх партнёраў, аднак застаецца незразумелым, ці зрабілі яны дастатковыя захады для абароны.