Bloomberg: расійскія мільярдэры прапанавалі купіць кантрольную долю «Яндэкса»

Праўленне мацярынскай кампаніі Yandex N.V. абмяркуе гэтую прапанову наступнага тыдня. Але канчатковае рашэнне можа быць прынятае пазней.

РБК звярнуўся ў «Яндэкс», але там адмовіліся ад каментароў. Крыніцы выдання кажуць, што кантроль галасоў мае застацца за камандай менеджменту «Яндэкса» — у асобе спецыяльна створанага фонду. Іншы суразмоўца РБК, знаёмы з ходам абмеркавання ўгоды, паведаміў, што падчас перамоў з інвестарамі агучваўся кошт кампаніі ў $7 млрд.

Патанін і Алякпераў маюць намер набыць не менш за 51% акцый «Яндэкса». Крыніцы Bloomberg адзначылі, што кошт акцый вызначаны з улікам распараджэння ўладаў, паводле якога інвестары з «недружалюбных» краін маюць даць скідку ў 50% пры выхадзе з расійскіх актываў. Yandex N.V. зарэгістраваная ў Нідэрландах, якія лічацца «недружалюбнай краінай» для Расіі.

У лістападзе 2022 года рада дырэктараў Yandex N.V. пачала вывучаць магчымасці змены структуры валодання і кіравання кампаніяй у сувязі з «цяперашняй геапалітычнай абстаноўкай». Акцыянерны капітал кампаніі падзелены паміж сямейным трастам заснавальніка «Яндэкса» Аркадзя Волажа (8,5%) ды іншымі супрацоўнікамі кампаніі (3,2%), астатнія 87,6% знаходзяцца ў свабодным абарачэнні. Пры гэтым сямейны траст Волажа з’яўляецца асноўным уладальнікам акцый з голасам (45,1%), як і сябры рады дырэктараў, службовыя асобы і супрацоўнікі кампаніі (6,6%).

24 лістапада мінулага года кіраўнік Падліковай палаты Аляксей Кудрын на сустрэчы з Уладзімірам Пуціным узгадніў схему падзелу «Яндэкса», якая мела на ўвазе, што Волаж страціць кантроль над расійскай часткай бізнэсу ў абмен на правы на інтэлектуальную ўласнасць у сферы беспілотных, воблачных ды іншых тэхналогій.

Суразмоўцы РБК дапускалі, што долю ў кампаніі могуць атрымаць іншыя інвестары, у тым ліку структуры ўладальніка «Інтэрроса» Уладзіміра Патаніна і саўладальніка групы ПІК Сяргея Гардзеева.

Акцыі «Яндэкса» праз навіны падаражэлі больш як на 5% за асобнік на таргах Маскоўскай біржы.