Аддзел навін 28 жніўня 2024, 17:01

Брат Дурава аб'яўлены ў вышук у Францыі

Брат Паўла Дурава і сузаснавальнік Telegram Мікалай Дураў знаходзіцца ў вышуку ў Францыі. Пра гэта паведамляе Politico са спасылкай на дакумент французскіх праваахоўнікаў.

5 каментарыяў

Брат Паўла Дурава і сузаснавальнік Telegram Мікалай Дураў знаходзіцца ў вышуку ў Францыі. Пра гэта паведамляе Politico са спасылкай на дакумент французскіх праваахоўнікаў.

Абодва былі абвешчаныя ў вышук у Францыі 25 сакавіка o справе аб саўдзеле ў захоўванні або распаўсюдзе дзіцячай парнаграфіі. То-бок расследаванне ў дачыненні да Паўла Дурава было пачата раней, чым паведамлялася — у ліпені.

Ордары на вышук Дуравых былі выдадзеныя пасля таго, як Telegram не адказаў на просьбу французскіх уладаў аб вызначэнні асобы падазраванага ў стварэнні дзіцячай парнаграфіі. Гэты чалавек нібыта абмяркоўваў спакушэнне дзяўчатак для здымак порна, якое пагражаў выкласці ў сетку, і прызнаўся ў згвалтаванні дзіцяці.

Таксама падставай для выдачы ордара стала тое, што платформа эксплуатуецца «шматлікімі злачыннымі групоўкамі», адзначана ў дакуменце.

Выданне падкрэслівае, што няма ніякіх сведчанняў таго, што браты Дуравы былі непасрэдна датычныя да незаконных дзеянняў, што былі выяўленыя расследаваннем.

Мікалай Дураў з’яўляецца старэйшым братам Паўла Дурава. Яны разам стварылі «УКантакце» і Telegram. Мікалай адказваў за тэхнічны бок абодвух праектаў. Дзе ён цяпер жыве, дакладна невядома. Паводле некаторых паведамленняў, ён знаходзіцца ў Расіі.