BuzzFeed незадаволены таксічным кантэнтам у сацсетках і створыць сваю сацсетку

BuzzFeed анансаваў запуск новай сацыяльнай сеткі, закліканай «распаўсюджваць радасць і даваць магчымасць для гуллівага творчага самавыяўлення». Паводле слоў генеральнага дырэктара кампаніі Джона Перэці, сучасныя платформы ўсё больш спадзяюцца на алгарытмы штучнага інтэлекту для ўтрымання ўвагі карыстальнікаў, што прыводзіць да распаўсюджвання кантэнту, які фарміруе залежнасць.

Перэці раскрытыкаваў такія кампаніі, як TikTok і Meta, за дамінаванне алгарытмаў у выбары кантэнту. Ён адзначыў, што такія сістэмы аддаюць перавагу матэрыялам, якія выклікаюць найбольш дакучлівыя і прадказальныя рэакцыі карыстальнікаў. Гэты тып кантэнту ён назваў «SNARF» — абрэвіятурай, якая пазначае Stakes, Novelty, Anger, Retention і Fear.

Паводле слоў Перэці, у адрозненне ад распаўсюджаных механік, новая сацсетка BuzzFeed будзе выкарыстоўваць тэхналогіі АІ такім чынам, каб даваць карыстальнікам больш свабоды і кантролю над сваім вопытам узаемадзеяння з платформай. Кампанія мае намер стварыць прастору, дзе будуць «пераважаць незвычайныя, добрыя і натхняльныя матэрыялы», вяртаючы інтэрнэту «атмасферу творчасці і лёгкасці».

BuzzFeed, які валодае таксама HuffPost і Tasty, мае намер стварыць уласную платформу, дзе будзе курыраваць найлепшыя матэрыялы, прапаноўваючы карыстальнікам кантэнт, абыходзячы алгарытмічныя рэкамендацыі і робячы акцэнт на арыгінальнасці і разнастайнасці. Buzzfeed Studios зоймецца вытворчасцю доўгафарматнага відэакантэнту, а таксама распрацоўкай прэміяльнага кантэнту, прызначанага для распаўсюджвання на стрымінгавых платформах.