ChatGPT знішчыў больш за палову вакансій для джуноў у брытанскім ІТ

Гаворка ідзе пра вакансіі для выпускнікоў, стажыроўкі і пачатковыя пазіцыі, на якіх не патрабуецца дыплом. За апошнія 2,5 гады іх стала менш на 31,9%. Калі ў 2022 годзе на такія пазіцыі прыходзілася 28,9% рынку ў цэлым, цяпер — толькі чвэрць.

Самае вялікае падзенне сярод вакансій пачатковага ўзроўню зафіксавана ў рытэйле — мінус 78,2% з лістапада 2022 года па май гэтага года. У сферы ІТ падзенне склала 54,8%, у фінансах і бухгалтэрыі — 50,8%. Пры гэтым агульная колькасць вакансій у краіне вярнулася да дапандэмійных значэнняў.

У Adzuna трэнд тлумачаць як макраэканамічнымі складанасцямі, з якімі сутыкаецца бізнес, так і распаўсюджваннем ШІ. Скарачэнне найму джунаў дзякуючы ўкараненню тэхналогіі дазваляе кампаніям павысіць агульную эфектыўнасць і знізіць выдаткі.

У маі СЕО Anthropic Дарыё Амадэй прадказаў, што на працягу пяці гадоў ШІ можа ліквідаваць палову офісных пазіцый пачатковага ўзроўню і прывесці да росту беспрацоўя на 10-20%. Многія лідэры галіны з ім не згодныя.