Claude Code пракачалі: штучны інтэлект цяпер сам вядзе задачы ад пачатку да канца

Новая версія уключае больш за тысячу змен і арыентавана перш за ўсё на дасведчаных карыстальнікаў, якія выкарыстоўваюць Claude Code не як чат-асістэнта, а як інфраструктуру для аркестрацыі агентаў. Абнаўленне закранае кіраванне жыццёвым цыклам агентаў, навыкі, што выкарыстоўваюцца паўторна, перанос сесій паміж асяроддзямі і паляпшэнні карыстацкага досведу ў тэрмінале.

Claude Code — інструмент Anthropic, пабудаваны на мадэлях сямейства Claude, уключаючы флагманскую Opus 4.5. Першапачаткова ён запускаўся як CLI-утыліта ў пачатку 2025 года, але за апошні год паступова эвалюцыянаваў у паўнавартасную платформу для аўтаномных ШІ-воркфлоў.

У версіі 2.1.0 распрацоўшчыкі дадалі інструменты, якія спрашчаюць працу з ШІ-агентамі. Цяпер можна гнутка кіраваць іх паводзінамі і доступам да інструментаў, абнаўляць навыкі без перазапуску, запускаць дапаможных агентаў у ізаляваным асяроддзі і наладжваць правы доступу без складаных правілаў. Claude Code таксама навучыўся адразу выдаваць вынікі на патрэбнай мове і дазваляе пераносіць працоўныя сесіі паміж лакальным тэрміналам і вэб-версіяй сэрвісу.

Распрацоўшчыкі таксама палепшылі працу ў тэрмінале: уніфікавалі кіраванне фонавымі задачамі, пашырылі Vim-навігацыю, паскорылі рэндэрынг і ліквідавалі шэраг праблем з бяспекай, уключаючы патэнцыйную ўцечку токенаў і ключоў у логах адладкі.

Стваральнік Claude Code Барыс Чорны падкрэслівае, што прадукт усё больш арыентуецца на сцэнарыі з доўгажывучымі агентамі і кампанентамі, што выкарыстоўваюцца паўторна. У гэтым сэнсе Claude Code паступова ператвараецца з асістэнта ў фрэймворк — асяроддзе, дзе ШІ выступае як праграмавальная частка стэка.

Claude Code даступны падпісчыкам Claude Pro, Max, Team і Enterprise. Каманды /teleport і /remote-env працуюць праз вэб-інтэрфейс claude.ai/code.