Ад Organic Maps адкалолася каманда — стварае новыя карты (зноў)

Канфлікт вакол картаграфічнага афлайн-сэрвісу з адкрытым зыходным кодам Organic Maps атрымаў заканамернае завяршэнне. Частка супольнасці адкалолася ад праекта і заснавала «форк» пад назвай CoMaps. Паколькі сам Organic Maps з’яўляецца адгалінаваннем ад першапачатковага праекта Maps.me, можна сказаць, што цяпер адбыўся «форк форка».

На хостынгавай платформе Codeberg CoMaps прэзентуе сябе як праект, народжаны з жадання стварыць «сапраўды адкрытую, празрыстую і грамадска-арыентаваную навігацыйную аплікацыю». Таксама гаворыцца, што ён быў ініцыяваны «ў адказ на рост занепакоенасці і незадаволенасці кіраўніцтвам праекта Organic Maps», а таксама на адсутнасць рашэння па сутнасці.

Сярод прынцыпаў праекта пералічваюцца празрыстасць, сумеснае прыняцце рашэнняў супольнасцю, адсутнасць камерцыйнай выгады і г. д. Заяўляецца, што праект існуе за кошт ахвяраванняў самой супольнасці, аднак не выключае гранты або прыбытак ад патэнцыйных B2B-прадуктаў, калі яны адпавядаюць прынцыпам супольнасці і не ўшчамляюць бясплатны і адкрыты характар праекта.

Юрыдычнай асобы ў CoMaps пакуль няма. У будучыні ініцыятары плануюць зарэгістравацца як некамерцыйная арганізацыя/кааператыў або далучыцца да ўжо існуючай арганізацыі, якая падтрымлівае праекты з адкрытым зыходным кодам. Структура кіравання і палітыка прыняцця рашэнняў яшчэ абмяркоўваюцца. Каманда працуе над рэлізам аплікацыі.

Колькі чалавек перайшло ў новую каманду незразумела. Пад адкрытым лістом, у якім кантрыб’ютары выказваюць недавер фаўндэрам, цяпер 250+ подпісаў.

У той жа час у Organic Maps таксама працягваецца праца. У афіцыйным тэлеграм-чаце праекта 2650+ удзельнікаў — прыкладна столькі ж, колькі і на пачатку публічнай стадыі канфлікту. Дарэчы, рэпазіторый Organic Maps зноў на GitHub.

Нагадаем, гісторыя з часовай блакіроўкай на GitHub рэпазіторыя опенсорснага праекта Organic Maps выявіла канфлікт сузаснавальнікаў — беларусаў Віктара Гавака і Аляксандра Барсука з аднаго боку і расіяніна Рамана Цісіка з другога. Як высветлілася, Цісік пазбавіў Барсука і Гавака статусу ўладальнікаў рэпазіторыя, бо ў яго назапасіліся прэтэнзіі да партнёраў (яны пералічаныя тут).

Услед за гэтым з’явіўся адкрыты ліст членаў супольнасці да фаўндэраў з патрабаваннем гарантый, што грамадскі праект не будзе манетызаваны або прададзены. Аўтары ліста выказвалі расчараванне тым, што іх, «відаць, падманулі, прымусіўшы працаваць бясплатна, каб павысіць ацэнку кампаніі і, такім чынам, капітал акцыянераў — з магчымым намерам прадаць кампанію або іншым чынам манетызаваць праект».

Прымусілі працаваць бясплатна. Супольнасць папулярных афлайн‑картаў Organic Maps папярэдзіла фаўндараў

Па тэме

Прымусілі працаваць бясплатна. Супольнасць папулярных афлайн‑картаў Organic Maps папярэдзіла фаўндараў

Канфлікт у Organic Maps. Як усімі любімы форк афлайн-мап Мельнічка трапіў «пад санкцыі» і што цяпер будзе

Па тэме

Канфлікт у Organic Maps. Як усімі любімы форк афлайн-мап Мельнічка трапіў «пад санкцыі» і што цяпер будзе