Справа Дурава выклікала цікавасць да праекта TON сярод інвестараў

Пасля затрымання французскімі ўладамі заснавальніка Telegram колькасць транзакцый у сетцы TON рэзка вырасла. 31 жніўня сетка зафіксавала 8,68 мільёна транзакцый, перавысіўшы рэкорд 17 студзеня ў 8,56 мільёна. За апошні тыдзень колькасць транзакцый дасягнула 10 мільёнаў (рост 160% ад моманту затрымання Дурава).

Колькасць актыўных адрасоў узрасла да 701 800, гэта на 6% больш, чым тыднем раней. Пры гэтым цана токена пасля інцыдэнту страціла больш за 30%. На думку аналітыкаў, рост транзакцый можа быць звязаны з павышанай увагай да праекта пасля інцыдэнту. Цяпер крыптавалюта таргуецца на ўзроўні $5,2.

Павел Дураў быў затрыманы ў Парыжы 24 жніўня. Французская пракуратура выставіла бізнэсоўцу абвінавачванні ў сувязях з арганізаванай злачыннасцю, удзеле ў распаўсюдзе незаконнага кантэнту і іншых злачынствах. Дураву забаронена пакідаць Францыю. У вышук таксама абвешчаны яго брат, Мікалай Дураў.