Алеся Чапкевич bel 17 ліпеня 2026, 16:24

Палова беларусаў ужо выкарыстоўвае ШІ для пошуку працы. Ці дапамагае гэта?

Кожны другі беларус карыстаецца ШІ пры пошуку працы, але давяраюць яму не ўсе і не ва ўсім. Такія вынікі апытання praca.by прыводзіць Onliner.

Пакінуць каментарый

Палова беларусаў ужо выкарыстоўвае ШІ для пошуку працы. Ці дапамагае гэта?

Кожны другі беларус карыстаецца ШІ пры пошуку працы, але давяраюць яму не ўсе і не ва ўсім. Такія вынікі апытання praca.by прыводзіць Onliner.

29,5% карыстаюцца ШІ рэгулярна, 24,4% хаця б аднойчы звярталіся да нейрасетак пры пошуку вакансій. Яшчэ 20,7% пакуль толькі збіраюцца паспрабаваць падобныя сервісы, а прынцыпова абыходзяцца без іх толькі чвэрць удзельнікаў даследавання.

Часцей за ўсё — 63% апытаных — нейрасеткі выкарыстоўваюць пры падрыхтоўцы рэзюмэ і суправаджальных лістоў. На другім месцы — падрыхтоўка да сумоўяў (53%). Кандыдаты просяць ШІ скласці спіс магчымых пытанняў, падказаць удалыя адказы, дапамагчы разабрацца са складанымі тэмамі.

Яшчэ 47% выкарыстоўваюць нейрасеткі для вывучэння працадаўцы перад рэагаваннем або сумоўем. А 44% аналізуюць з дапамогай ШІ самі вакансіі, каб зразумець, якія патрабаванні працадавец не напісаў напрамую. Гэта значыць, нейрасеткі становяцца не проста рэдактарам тэксту, а своеасаблівым кар’ерным кансультантам.

Выкарыстанне такіх інструментаў не заўсёды праходзіць незаўважана. Толькі 41% удзельнікаў даследавання заявілі, што ніколі не сутыкаліся з негатыўнай рэакцыяй працадаўцаў.

Астатнія прызналіся, што праблемы ўзнікалі — некаторым наўпрост сказалі, што тэкст выглядае згенераваным, а хтось папросту адчуў насцярожанасць з боку рэкрутэра. Больш за чвэрць апытаных ніякіх каментарыяў не атрымалі, але самі вырашылі, што занадта захапіліся аўтаматызацыяй. Гэта значыць, многія кандыдаты ўжо самі пачынаюць заўважаць, дзе тэкст становіцца занадта шаблонным і перастае рабіць уражанне жывога чалавека.

Пры гэтым цалкам перадаваць пошук працы нейрасеткам большасць не збіраецца. Толькі 12% гатовыя даручыць ШІ практычна ўвесь працэс — ад пошуку вакансій да перамоваў пра заробак.

Часцей за ўсё нейрасеткі разглядаюць менавіта як памочніка. 39% гатовыя дэлегаваць ШІ руціну, але фінальныя рашэнні хочуць прымаць самастойна. 29% лічаць, што пытанні зносін з працадаўцам машына пакуль замяніць не можа, а кожны пяты асцерагаецца, што поўная аўтаматызацыя зробіць рынак працы абязлічаным.

Толькі 22% спецыяльна дадавалі ў рэзюмэ ключавыя словы з вакансій пры дапамозе ШІ, яшчэ 12% цалкам адаптавалі рэзюмэ пад аўтаматызаваныя сістэмы, якімі карыстаюцца рэкрутэры. Пры гэтым 16,5% ведаюць пра падобныя магчымасці, але не выкарыстоўваюць іх, 16% ніколі гэтым не цікавіліся, а адразу 33,5% упершыню пачулі тэрмін ATS падчас апытання.

Адказ на пытанне, ці дапамагае ШІ знайсці працу, аказаўся неадназначным. Больш за 22% удзельнікаў даследавання ўпэўнены, што дзякуючы ШІ сталі хутчэй шукаць працу і прыкметна павысілі якасць сваіх рэагаванняў. Яшчэ 38% кажуць, што нейрасеткі дапамагаюць, але эфект ніжэйшы за чаканні. Каля 20% не заўважылі ніякай розніцы, і столькі ж лічаць, што ШІ нават пагоршыў вынік. Асноўныя прычыны — занадта шаблонныя тэксты, аднолькавыя суправаджальныя лісты і адчуванне, што працадаўцы хутка навучыліся распазнаваць падобныя рэагаванні.