Аддзел навін 22 студзеня 2025, 16:41

Meta стала хаваць хэштэгі і пошукавыя вынікі дэмакратаў пасля інаўгурацыі Трампа

У Meta у тэрміновым парадку выпраўляюць праблемы з Instagram: карыстальнікі не бачаць пошукавых вынікаў на запыты «Democrat» і «Democrats», піша BBC.

2 каментарыя

У Meta у тэрміновым парадку выпраўляюць праблемы з Instagram: карыстальнікі не бачаць пошукавых вынікаў на запыты «Democrat» і «Democrats», піша BBC.

Некаторыя карыстальнікі абвінавацілі сацсетку ў палітычнай перадузятасці, адзначыўшы, што праблема стала назірацца пасля афіцыйнага ўступлення на пасаду рэспубліканца Дональда Трампа ў панядзелак. На цырымоніі прысутнічаў гендырэктар Meta Марк Цукерберг.

Кампанія настойвае, што інаўгурацыя тут ні пры чым і што тэхнічныя непаладкі ўзніклі з іншымі хэштэгамі таксама. Але таймінг вельмі няўдалы для Instagram, адзначаюць эксперты: у такім палярызаваным грамадстве падобныя збоі нават калі і выпадковыя, то ўсё роўна могуць навесці на думку, што кампанія гуляе на пэўным баку, а таксама падагрэць тэорыі змовы і ў цэлым ударыць па яе рэпутацыі.

Пошук па хэштэгах #Democrat і #Democrats не дае вынікаў, а #Republican вяртае 3,3 млн Instagram-пастоў. Калі ўручную ўвесці ў пошук «Democrats», а не націснуць на хэштэг, сацсетка выдае паведамленне пра тое, што «схавала гэтыя вынікі», паколькі яны могуць утрымліваць «адчувальны кантэнт». Зрэшты, адзначае выданне, некарэктна вынікі адлюстроўваюцца і на запыт «Republicans» замест «Republican».

На праблему таксама звярнуў увагу партал Mashable. Паведамляецца, што дзівацтвы з тэгамі былі заўважаныя зранку ў аўторак.