OpenAI запусціла свой адказ DeepSeek — мадэль, якая «разважае», упершыню стала даступная без падпіскі

Новая мадэль ужо даступная ўсім карыстальнікам ChatGPT бясплатна. Ва ўладальнікаў падпіскі Plus і Team будзе вышэйшым дзённы ліміт запытаў — 150 штук. Для падпісчыкаў Pro доступ неабмежаваны. Выбраць навінку платныя карыстальнікі могуць у выпадальным меню ChatGPT. Бясплатным трэба націснуць на кнопку «Абгрунтуй» у дыялогавым акне або на кнопку змены мадэлі ва ўжо выдадзеным адказе.

Таксама o3-mini даступная некаторым распрацоўшчыкам праз API, але першапачаткова без падтрымкі выяў. Распрацоўшчыкі могуць выбраць адзін з трох узроўняў прадукцыйнасці мадэлі (low, medium, high) у залежнасці ад сваіх патрэб і ўпадабанай затрымкі.

o3-mini заточаная пад STEM-задачы па праграмаванні, матэматыцы ды іншых навуках. Паводле слоў OpenAI, o3-mini ў цэлым не саступае сваім папярэдніцам o1 і o1-mini ў плане здольнасцяў, але яна хутчэйшая і таннейшая.

Кампанія сцвярджае, што ў ходзе выпрабаванняў іншыя карыстальнікі аддавалі перавагу адказам o3-mini перад адказамі o1-mini больш як у палове выпадкаў. Таксама o3-mini на 39% радзей груба памыляецца ў складаных пытаннях пра рэальны свет у A/B-тэстах, а таксама дае выразнейшыя адказы і працуе на 24% хутчэй за o1-mini.

«Разумовыя» здольнасці o3-mini ў ChatGPT па змаўчанні наладжаныя на сярэдні ўзровень, які дае баланс паміж якасцю і хуткасцю працы. Платныя юзеры могуць выбраць варыянт o3-mini-high — ён «разумнейшы», але думае даўжэй.

Цана o3-mini — 55 цэнтаў за 1 млн уваходных токенаў і $4,4 за 1 млн выходных токенаў (1 млн токенаў прыкладна складае 750 тысяч слоў). Гэта на 63% менш у параўнанні з о1-mini і бліжэй да расцэнак DeepSeek. Кітайскі стартап бярэ 14 цэнтаў і $2,19 адпаведна за доступ да мадэлі R1 праз API.

Што тычыцца параўнання магчымасцяў, у тэстах AIME 2024 на разуменне інструкцый o3-mini лепшая за R1 — дакладней, толькі версія «high». Таксама яна лепшая за R1 у задачах на праграмаванне SWE-bench Verified, але толькі на 0,1 пункта і толькі на «максімалках». Версія «low» з разумовымі здольнасцямі ніжэйшымі за сярэдняе прайграе R1 у задачах узроўню PhD па фізіцы, біялогіі і хіміі з бэнчмарка GPQA Diamond.