Сярод айцiшнiкаў шукаюць донараў беларускай мовы. Трэба 320 гадзiн маўлення

Як паведамiў dev.by стваральнiк say.by, кiраўнiк IТ-аддзела адной з мiнскiх кампанiй Аляксандр Шастаковiч, сёння пачалося агучванне заданняў для айцiшнiкаў. 

Каманда say.by збiрае галасы, каб палепшыць працу тэхналогій распазнавання беларускага маўлення. Паўгады таму стартаперы актывiзавалi родную мову ў міжнародным праеце Mozilla Common Voice, і на дадзены момант з дапамогай добраахвотнiкаў (цi донараў, ях iх заве каманда) ужо сабралi «620 гадзін найлепшага ў свеце беларускага маўлення». А стаiць мэта сабраць 1000.

Гэтым разам галасы збіраюцца праз асобны сайт donar.by, дзе цягам месяца будзе напаўняцца як адкрытая калекцыя Common Voice, так і заданні для інтэрактыўнага навучання беларускай мове ў розных прафесійных сферах. 

Заданнi для айцiшнiкаў, як адзначае Аляксандр, складаюцца з 5 секцый — «распрацоўка», «база звестак», «камунікацыя з кліентамі і кіраванне», «сеціва», «праца з дакументамі». Далучыцца да агучвання вельмі проста:

1. трэба зайсці на сайт https://donar.by;
2. пачаць агучваць або праслухоўваць ужо агучаныя сказы;
3. пры жаданні стварыць профіль донара беларускай мовы і атрымаць сертыфікат.

Аляксандр дадае, што напрыканцы 300 самых актыўных донараў беларускай мовы атрымаюць сімвалічныя падарункі ад say.by, а таксама ад партнёраў марафону агучвання, сярод якiх ёсць i некалькі беларускіх ІТ-кампаній — ActiveCloud, TCP Soft i Jet BI.