Дорсі і Маск хочуць скасаваць аўтарскае права. Крытыкі: тады ўсе засталіся б без Twitter

Дорсі заклікаў у сваім акаўнце ў X «скасаваць усе законы аб інтэлектуальнай уласнасці». Маск адказаў, што «згодны» з гэтым сцвярджэннем. Не зусім ясна, што падштурхнула заснавальніка Twitter выказацца на гэтую тэму, але заява прагучала на фоне шматлікіх судовых пазоваў, пададзеных супраць кампаній, што займаюцца распрацоўкай штучнага інтэлекту, якіх абвінавачваюць у парушэнні аўтарскіх правоў пры навучанні сваіх мадэляў.

Бізнесмен паспрабаваў патлумачыць сваю пазіцыю ў наступных адказах. Ён заявіў, што існуюць «нашмат лепшыя мадэлі аплаты аўтараў», у той час як «цяперашнія забіраюць у іх занадта шмат і толькі займаюцца пошукам рэнты». Дорсі таксама адзначыў, што менавіта «крэатыўнасць адрознівае нас», а існая сістэма інтэлектуальнай уласнасці абмяжоўвае яе і перадае «размеркаванне выплат пасярэднікам», якія, на яго думку, аплачваюць працу несправядліва.

Заснавальнік Fairly Trained Эд Ньютан-Рэкс назваў пасты Дорсі і Маска «абвяшчэннем вайны супраць аўтараў». Яго арганізацыя займаецца сертыфікацыяй кампаній, якія атрымалі дазвол на выкарыстанне абароненых аўтарскім правам дадзеных для навучання ШІ-мадэляў.

Пісьменнік Лінкальн Мішэль таксама рэзка раскрытыкаваў пазіцыю Дорсі, нагадаўшы, што «ніводная з кампаній Джэка ці Ілана не існавала б без закона аб інтэлектуальнай уласнасці». Ён выказаў меркаванне, што прадпрымальнікі «проста ненавідзяць творцаў» і наўрад ці адмовяцца ад сваіх патэнтаў і таварных знакаў.

Юрыст і былы кандыдат у віцэ-прэзідэнты ЗША Ніколь Шанахан выступіла супраць гэтай ідэі, заявіўшы, што «закон аб інтэлектуальнай уласнасці — гэта адзінае, што аддзяляе творчасць чалавека ад машыннай». Яна прапанавала абмеркаваць рэфармаванне існуючай сістэмы аўтарскага права.