Аднарог PandaDoc скарачае QA і Scrum Master у розных краінах
Прадуктовая кампанія PandaDoc апавясціла супрацоўнікаў аб звальненнях, пад іх маглі трапіць каля 25 чалавек, у асноўным QA і Scrum Master.
Пра гэта dev.by на ўмовах ананімнасці паведамілі супрацоўнікі кампаніі. Паводле слоў крыніц, аб звальненнях кампанія паведаміла ў панядзелак 4 снежня на агульным сазвоне. Гэта не першыя звальненні за апошнія некалькі месяцаў.
— Перадумовы да звальненняў ужо былі. Гэта і агульная сітуацыя на рынку, і стан эканомікі, і неабходнасць аптымізаваць выдаткі. Напрыклад, практычна нікому з калег, з якімі я маю гутару, сёлета не ўздымалі заробкаў, — расказала адная з супрацоўніц.
PandaDoc (штаб-кватэра ў Каліфорніі, ЗША) заснаваная ў 2011 годзе Сяргеем Барысюком і Мікітам Мікадам, стварае інструмент аўтаматызацыі і кіравання дакументамі.
Буйны офіс распрацоўкі ў Мінску працаваў да падзей 2020-2021. Пасля выбараў 2020 года сузаснавальнікі ініцыявалі стварэнне прыватнай ініцыятывы па зборы грошай для сілавікоў, якія вырашылі змяніць прафесію. Ужо ў верасні ў офісе кампаніі прайшлі ператрусы, чатыры супрацоўнікі PandaDoc апынуліся ў СІЗА. Апошні фігурант «справы PandaDoc» менеджар па прадукце Віктар Куўшынаў выйшаў на волю толькі праз год.
На пачатку 2021 года кампанія пачала ліквідаваць беларускую юрыдычную асобу, каманда рэлакавалася. Сёння офісы распрацоўкі функцыянуюць ва Украіне, Польшчы, Партугаліі.
У верасні 2021 года PandaDoc завяршыла інвестраўнд C (дакладная сума інвестыцый не раскрывалася), па выніках раўнда атрымала ацэнку ў мільярд долараў і стала аднарогам. Агульны памер інвестыцый у стартап (за выключэннем раўнда С) — 51,1 млн.
Ад 2020 года PandaDoc рэгулярна трапляе ў прэстыжныя рэйтынгі амерыканскіх кампаній. Панда — сярод найлепшых стартапаў-працадаўцаў у ЗША, у топе-500 кампаній, што развіваюцца, у топе-5000 самых хуткарослых бізнэсаў ЗША.
Паводле даных лінкедзіна, актуальны памер каманды — 800+ супрацоўнікаў.
Паводле слоў іншай супрацоўніцы, размовы аб звальненнях сярод калег хадзілі ўжо каля двух месяцаў, але ніхто да канца не даваў веры. «Усё здарылася даволі рэзка. Менеджары даведаліся пра рашэнне ў мінулы чацвер, а ў панядзелак рашэнне агучыла кампанія».
Звальненні закранулі ўкраінскі, польскі і партугальскі офісы. Сярод 25 чалавек, якія трапілі пад скарачэнне — толькі QA і Scrum Master.
— Супрацоўнікам патлумачылі, што працэнт выдаткаў на інжынірынг у агульным аб’ёме выдаткаў кампаніі занадта высокі. Самае бязбольнае — звольніць QA і Scrum Master.
У лінкедзіне мы знайшлі профілі больш як 10 супрацоўнікаў PandaDoc (QA і Scrum Master), якія апублікавалі за апошнія двое сутак пасты пра пошук новай працы.
Паводле слоў супрацоўнікаў PandaDoc, кампанія паспрабавала максімальна карэктна растлумачыць сітуацыю.
— Кожнаму, хто трапіў пад скарачэнне, прызначылі званок асабіста з дырэктарам інжынірынгу і HR. Усё расказалі, патлумачылі, падзякавалі за працу. У мяне няма ніякіх крыўдаў на PandaDoc. Гэта на дадзены момант найлепшая кампанія, у якой мне давялося працаваць. Шкада, што ў выніку я апынулася ў спісе на звальненне.
Мы звярнуліся ў кампанію па каментары з нагоды звальненняў. Апублікуем адказ, калі атрымаем.
Паводле інфармацыі dev.by, гэта не першыя звальненні ў PandaDoc за апошнія месяцы. Адная з экс-супрацоўніц кампаніі расказала, што ў верасні ўжо была хваля скарачэнняў.
— Пад звальненні тады патрапілі супрацоўнікі ўкраінскага, польскага, партугальскага і амерыканскага офісаў — рэкрутмент-аддзелы, брэнд-спецыялісты і многія іншыя. На жаль, цяперашняя сітуацыя ў свеце, рэцэсія не пакінулі кампаніям і іх супрацоўнікам шанцаў для далейшага супрацоўніцтва.
Я таксама трапіла пад скарачэнне. Мяне апавясціў менеджар, наступнага дня мне заблакавалі доступы. Па факце я не працавала, але яшчэ два месяцы афіцыйна лічылася ў кампаніі пасля паведамлення аб звальненні. У гэты перыяд кампанія выплачвала мне заробак, а я магла шукаць новую працу, — расказала экс-супрацоўніца кампаніі.
Цікава, што якраз у верасні PandaDoc купіў нямецкую фінтэх-кампанію Denario. Пра гэта ў сацсетках паведамляў сузаснавальнік кампаніі Мікіта Мікада. Сума ўгоды не агучвалася.
Паводле слоў суразмоўцаў, сёлета кампанія не толькі звальняла, але і наймала людзей, ды толькі кропкава. Цяпер на сайце PandaDoc размешчана каля 20 вакансій для аддаленай працы.
Да апошніх звальненняў у кампаніі, паводле слоў крыніц, працавала больш за 750 супрацоўнікаў у чатырох лакацыях — ЗША, Польшча, Украіна, Партугалія.
dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам, увагай і данатамі.
І яшчэ крыптой, тут кашалькі.
Дзякуй, што прачыталі гэтае паведамленне.
Читать на dev.by