EPAM і Wargaming заплацілі мінімальныя за 2+ гады падаткі ў Літве

EPAM і Wargaming па выніках першага квартала 2025 года засталіся найбуйнейшымі падаткаплацельшчыкамі сярод ІТ-кампаній Літвы, вынікае з дадзеных Дзяржаўнай падатковай інспекцыі пры Міністэрстве фінансаў Літвы. Аднак сумы падаткаў, якія кампаніі заплацілі ў бюджэт Літвы, скараціліся.

У агульным топ-50 сектара «інфармацыя і сувязь» за студзень–сакавік EPAM Sistemos апынулася на 4 месцы, а Wargaming — на 5 месцы. Больш падаткаў заплацілі тэлекам-аператары Telia Lietuva (22,9 млн еўра), TELE2 (17,6 млн еўра), Bitė Lietuva (10,0 млн еўра).

EPAM

EPAM Sistemos за першы квартал заплаціла 3,7 млн еўра падаткаў — на 14% менш, чым у першым квартале мінулага года (4,3 млн еўра). За апошнія 2+ гады гэта антырэкорд па выплаце квартальных падаткаў у літоўскі бюджэт. Больш за тое, упершыню з 2023 года сума падаткаў апусцілася ніжэй за 4 млн еўра.

Літоўская каманда EPAM працягвае скарачацца, што, верагодна, і ўплывае на падатковыя адлічэнні кампаніі.

З пачатку гэтага года літоўская каманда скарацілася на 20+ чалавек. Цяпер у двух філіялах (у Вільні і Коўне) зарэгістравана 1,2 тысячы супрацоўнікаў. Пры гэтым у офісе ў Вільні ўпершыню за доўгі час у штаце менш за 1000 спецыялістаў.

Wargaming

Літоўская «дачка» Wargaming за першы квартал заплаціла ў бюджэт Літвы 2,94 млн еўра. У параўнанні з аналагічным перыядам мінулага года падатковыя адлічэнні таксама скараціліся, але нязначна — прыкладна на 300 тыс. долараў (мінус 2%). Тым не менш за апошнія 2+ гады гэта мінімальная сума выплачаных падаткаў для кампаніі.

З Wargaming таксама працягваюць сыходзіць супрацоўнікі. Са студзеня гэтага года кампанія страціла ўдвая больш спецыялістаў, чым EPAM — 40+ чалавек. На дадзены момант у кампаніі зарэгістраваны 791 супрацоўнік.

EPAM застаўся ў топ-100

Па выніках першага квартала гэтага года EPAM Sistemos засталася ў топ-100 найбуйнейшых падаткаплацельшчыкаў Літвы, хоць і страціла 20 пазіцый. Кампанія заняла 95 месца. Для параўнання: у першым квартале мінулага года яна была на 75 месцы, а па выніках усяго мінулага года — на 72 месцы.

Wargaming па выніках мінулага года вылецеў з топ-100, заняўшы толькі 109 месца. Па выніках першага квартала гэтага года кампанія таксама апынулася па-за першай сотняй, заняўшы 127-е месца. У першым квартале мінулага года Wargaming быў на 124 месцы.

Хто яшчэ ў спісах падаткаплацельшчыкаў?

Сярод літоўскіх падаткаплацельшчыкаў, згаданых у справаздачах Дзяржаўнай падатковай інспекцыі, — яшчэ чатыры кампаніі з беларускімі каранямі. Усе — прадуктавікі.

Кампанія Gurtam заплаціла за першы квартал 1,17 млн еўра падаткаў — на 20 тыс. еўра больш, чым у першым квартале мінулага года. А вось мабільны распрацоўшчык MA (былы Melsoft) скараціў падатковыя адлічэнні з 1,2 да 1 млн еўра. Распрацоўшчык аплікацый для жаночага здароўя Flo заплаціў у бюджэт Літвы 0,6 млн еўра (дадзеных за першы квартал 2024 года няма). Яшчэ адзін мабільны распрацоўшчык Belka Games заплаціў 0,1 млн еўра падаткаў.