Што з грашыма і актывамі EPAM у Беларусі на пачатку 2025 года

Грошы ў банках

Аперацыйная пульсацыя сродкаў на рахунках кампаніі відаць на графіку — з тэндэнцыяй да зніжэння. Відавочна, гэта звязана з паступовым скарачэннем каманды EPAM у Беларусі.

У цэлым за апошнія 2+ гады $24,6 млн — гэта мінімальная сума на рахунках EPAM у беларускіх банках.

EPAM у сваёй справаздачы не распавядае падрабязна пра рух сродкаў у банках. Кампанія толькі адзначае, што карэктуе суму на рахунках у беларускіх банках з улікам патрэбаў беларускага офіса. Таксама кампанія перамяшчала лішнія сродкі на рынкі з больш развітым банкаўскім сектарам.

Актывы

Актывы EPAM у Беларусі працягваюць скарачацца. На канец сакавіка яны ацэньваліся ў $45,2 млн. За год кошт актываў знізіўся на $3,3 млн.

Па кошце актываў Беларусь застаецца на другім месцы сярод асноўных лакацый.

Агульны кошт усіх актываў EPAM на канец сакавіка гэтага года перавысіў $203 млн. Адносна да сакавіка 2024 года кошт актываў знізіўся на $19 млн, або на 9%.

Неагучаныя ўгоды

Паглядзелі, пра што яшчэ EPAM распавёў у сваёй справаздачы.

У прыватнасці, кампанія паведаміла пра фінансавыя ўгоды, здзейсненыя ў 2024 годзе.

У пачатку верасня 2024 года стала вядома пра набыццё амерыканскай кансалтынгавай кампаніі Neoris за $626,3 млн (99,7%). Як вынікае са справаздачы, у сакавіку гэтага года EPAM выкупіў астатнія акцыі за $1,4 млн.

У кастрычніку 2024 года EPAM набыў кансалтынгавую кампанію First Derivative з Паўночнай Ірландыі за $300 млн.

Аказалася, што гэта былі не адзіныя ўгоды EPAM у мінулым годзе. У справаздачы гаворыцца, што ў 2024 годзе кампанія заключыла яшчэ тры ўгоды на агульную суму $74,2 млн. Гэта дазволіла «пашырыць геаграфію дзейнасці ў Лацінскай Амерыцы і Еўропе, а таксама дадаць $20,3 млн нематэрыяльных актываў». Аднак кампанія вырашыла не раскрываць падрабязнасці ўгод, бо яны не паўплывалі істотна на фінансавую справаздачнасць EPAM.

Ці хопіць грошай?

EPAM таксама закрануў агульную фінансавую сітуацыю. За першы квартал кампанія атрымала рэкордную за апошнія 5 гадоў квартальную выручку — $1,3 млрд. За другі квартал кампанія плануе абнавіць рэкорд і атрымаць $1,32–1,34 млрд. EPAM чакае рост выручкі за 2025 год на 11,5–14,5%. Калі так здарыцца, даходы кампаніі ўпершыню перавысяць $5 млрд.

Ацэньваючы сітуацыю, у тым ліку попыт на рынку, кіраўніцтва EPAM лічыць, што кампаніі хопіць рэсурсаў для пакрыцця ўсіх выдаткаў на бліжэйшы год.

«Наяўных у нас грашовых сродкаў, кароткатэрміновых інвестыцый, разам з чаканымі грашовымі патокамі ад аперацыйнай дзейнасці, будзе дастаткова для пакрыцця меркаваных аперацыйных і капітальных выдаткаў як мінімум на працягу наступных дванаццаці месяцаў.

Мы таксама валодаем дастатковай фінансавай гнуткасцю для рэалізацыі нашых стратэгічных мэтаў, уключаючы магчымасць ажыццяўлення набыццяў і стратэгічных інвестыцый у агляднай будучыні», — адзначаецца ў справаздачы.